Shillong, Jylliew 09 : U Symbud Myntri Rangbah ba peit ïa ka tnad Urban Affairs, Bah Sniawbhalang Dhar ha ka sngi Nyngkong u la ïathuh ba ka sorkar ka la ïoh ïa ka jingkyrpad na kiba bun ki Dorbar Shnong ban pyndait noh da ki CCTV na ka bynta ka jingshngain ki nongshong shnong kiba hap ha nongbah Shillong.
Haba kren bad ki lad pathai khubor, u Symbud Myntri Rangbah u la ong ba kane ka jingkyrpad ka la mih hadien ba la dep ban pyndait ïa kumba 300 tylli tam ki CCTV ha kylleng ki bynta jong ka nongbah Shillong lyngba ka Integrated Command and Control Centre (ICCC).
Shuh shuh u la ïathuh ruh ba ka don ruh ka jingthmu na ka sorkar ban pynïar ïa kane ka jingtreikam kata ban pyndait ïa ki kor CCTV wat sha kiwei ki distrik jong ka jylla kum sha Jowai bad ruh sha Tura.
“Ngi dang bishar bniah ïa kane mynta katkum ka jingheh jong ka jaka naba ka jingdonkam ka lah ban kham bun,” u la bynrap biang.
