Ka step Monday 09.06.25 ka dei ka step kaba kmen tam ban sdang ïa ka taiew da ka khubor babha na u Chief Minister Conrad Kongal Sangma kaba u la pathai lyngba ka Tweet jong u ba la ïoh ban kem ïa ka Sonam Raghuvanshi, ka kurim ba dang shu dep ïathoh jong u Raja Raghuvanshi da ki pulit ka Nandganj, Gazipur Madhya Pradesh. Kum ka jingpynkynmaw ka Sonam bad u Raja ki la ïathoh shongkurim ha ka 11th May 2025 ha Indore bad hadien 11 sngi ki la wankai kmen Honeymoon sha Sohra, kumta hadien ba ki la sah shimiet ha Balaji Guest House Shillong ha ka miet 21.05.25; dangstep ha ka sngi babud ki la mih da ka Scooter ba shuwai na Keating Road ban leit sha Sohra hapdeng ka jingther jong u lapbah lapsan. Kumta ki la poi ha kawei ka Guest House ha Sohra kaba la ïoh ban ringdur ïa ki lyngba ka CCTV ba kin shu buh ïa ki luggage jong ki tang shiphang namar ba ym don kamra ba lait shuh, kat kum ka jingïathuh jong u Manager jong katei ka Guest House. Ïa kitei ki jingjia baroh la record lyngba ka footage jong cctv ba la pathai da u t7 news ha kaba la ïohi ba u Raja u plied ïa ka suitcase bad ka Sonam ba ka law bad thep hapoh seat Scooter ïa ka Raincoat rongïong thoh saw jong ka, hashwa ba kin leit sahmiet sha Shipara Home Stay ha Nongriat.
Kumta ki la poi ha Mawlakhiat parking ban set ïa ka scooter hangtei bad ïaid da ka kjat ryngkat bad u local guide ban poi sha Nongriat ha ka por janmiet jong ka 22.05.25. Hynrei ha ka step 23.05.25 pat, ki la mih dangstep 5:30-6.00 AM na Shipara Home Stay ban leit phai biang sha Sohra. Ha lynti, ka Sonam ka la phone ïa ka kyiaw kurim jong ka ba ki don ha ka jaka ba kynjah bad khlaw barben, ynda ka kyiaw ka la kyrpad ïa ka Sonam ban aikren ïa u Raja, namar ba ka phone jong u ka la switchoff, ka Sonam ka la thok ba u Raja u don jngai wat la u don tang kumba 10 phut ei ei na ka, kat kum ka jingïathuh jong kiwei pat ki guide ba ïakynduh ha lynti. Hynrei ki local guide kiba ïohi ha ka por ba ka Sonam ka kiew ïa u thiep jong ka Nongriat, ki ïathuh ba don laingut ki shynrang ba ïakren Hindi bad u Raja katba ka Sonam ka dangbud nadien jong ki.
Ka Drama jong ka Sonam ka la sdang ban ïaid thik kumba ka la plan. Ynda la poi ha jaka set ïaka Scooter ha Mawlakhiat ki la leit noh sha Wei Sawdong Parking Lot bad dei hangta, ba ka Sonam ryngkat bad ki riewbamnong kiba la shu wai (hired killers) imat, ki la trei ïa u Raja tang hapoh 18-20 minit (namar u GPS u pyni ba ka Scooter ka sangeh hangta tang katta minit ha katei ka jaka) da ka wait local ba dang shu thied thymmai bad bret syndon ïa ka met jong u nalor ka Parking sha trai synrang riat, da kaba tap ïa ka sopti lieh ba ka phong ban pynkup ha u Raja, tang ban pynthame ba nym lap dien. Nangta, ka leit bret sa ïa ka raincoat jong ka hajan Mawkma bad leitphai ryngkat bad uwei u nongpynïap da ka scooter bad ieh syndon ïa ka ha Sohrarim hashwa ba kin phet krat biang sha Madhya Pradesh.
Katei ka jingleh ka la pynshaïong ngaiñ ïa ki pulit ka Meghalaya khamtam hadien ba kiba haïing kim ïoh contact shuh ïa ki naduh ka janmiet jong ka 23.05.25. Khyndiat sngi hadien, la wanpoi sa u MP katei ka jylla ban ïakynduh ïa u Chief Secretary & DGP ka Meghalaya ha Shillong. Nangta, ki pulit ka jylla ki la sdang ban shimkhia ban pynlong ïa ka jingwad ha kylleng ki riat Sohra namar ba u hymmen jong u Raja, u Vipin Raghuvanshi u kynnoh ba ki pulit ka Meghalaya kim shym la shim khia ei ei, hynrei dei hadien ka jingwad ba bniah naduh ka 25.05.25 ba ki Search Team ki la lap ïa ka met ba la sdangpyut jong u Raja natrai jong katei ka riat ba la kdew haneng ha ka 02.06.25. Hadien kata ruh utei u hymmen u kynnoh ba la pynïap da ki traishnong ban lute, bad ïa ka Sonam la rongjubor (kidnapped) sha Bangladesh bad dei ban aiti tohkit noh sha ka CBI. Hynrei ka jingmutsniew jong ka Sonam ka paw hi ha ka CCTV ba ka shu bunkam lynter tang ban kren phone bad text shajngai jong u Raja. Hynrei, kaba kmen eh ka long, hadien ba ki pulit ki la lap sabud ba u Raja u la shah pynïap, ki la thung noh da ka Special Investigation Team (SIT) ban tihbniah ïa katei ka jingshahpynïap bad jingjahklep jong ka Sonam.
Hangne ngi ïohi ïa ka jingstad bad jingshemphang jong ki pulit ka Meghalaya ban treikam, tang hynñiew sngi hadien ba ki la shimti ban tohkit, ki pulit ki la connect lut ïa kitei ki dot (dak ba aiksai) naduh Guest House Shillong, Keating Road sha Mawlakhiat, Nongriat, Wei Sawdong, Mawkma bad Sohrarim ter ter; khatduh ki la lah ban track ïa ka location jong ka phone ka Sonam bad jling ki khyrwit syndon da ka sixer mynnin ka miet ban pynkylla baji ïa kito kiba kren beiñ, kat haduh ba ki la ïoh ban kem noh ïa ka Sonam ruh ryngkat bad ki laingut ki Hired Killers (ki Bamnong) jong ka.
Naduh kato ka column ba la mih ha kane ka sngi Saitjaiñ, u nongthoh u pynpaw ba ki pulit jong ngi hapoh ka jingïalam jong u Bah Vivek Syiem, SP kin lah beit ban tihbniah ban pynshisha ïa ka ‘dood ka dood pani ka pani’ (ban pynkyrpang ïa ka um bad ka dud la ka jong). La kdew ruh ha kato ka sngi, ba kane ka case kan ïasyriem bha bad ka serial jong ka Crime Patrol, thik ka long kumta, mano ba lah ban tip, namar ïa ka kaiphod jingtohkit ngin sa tip khambha ynda ki pulit Meghalaya kin ïoh ban wanrah ban tohkit ïa ka Sonam shane. Ha ki Crime Patrol ngi ïohi ba ka lok ïathoh, ka shetkylla ïa u lok tang namar ba kam hun ïa kata ka arranged marriage (ïathoh khyllad), phim tip ïoh lehse ka Sonam ruh ka la don lypa u baieit hashwa ïa u Raja, te ki sa ïasuh buit bad uta, ym lah ban tip, hynrei ngin sa tip hi shen.
Ka jingaikhublei ba kyrpang ka leit sha u Chief Minister, SIT, Police department, Search and Rescue Team baroh, kynthup ïa ka NSDRF, Adventure Association West Jaintia Hills, ki volunteer traishnong bad baroh kiba donkti ban wad pynshitom ryngkat bad ki riewduwai ïa ka Ri ban lait na ki jingma bad jingpynjah burom. Da ka jingtrei shitom jong ki pulit, la pyllait ksuid ïa ka jylla bad ïa ki traishnong jong ngi na ki jingshah pharep bad biahphongrai ba khlem nongrim khamtam na kiba haïing jong u Raja bad ka Sonam.
Mynta, ngi lah ban proof sha ka pyrthei ba ka Ri jong ngi ka dei ka ri tipbriew tipblei, ka bym ju leh ïa ki kam pohjait, wat la ki don ki jingjia thohmut thohmat ba malu mala hangne hangtai. Kane ka jinglah jong ki police jong ngi ban khylliap noh (cracked) ïa katei ka case tang hapoh 7 sngi, ka pynpaw pyrthei ba kiwei ki jylla ha India kim dei satia ban kheiñ troiñ ïa ki. Nalor nangta, kito kiba dawa CBI Inquiry ruh kin shaïong ngaiñ, namar ba ki la pynpoi wat shaduh ki shkor jong u Prime Minister Narendra Modi. Kane jingjia ha kine ki khyndiat sngi ka la pynhiar khyndiat ïa ka jingwantuid jong ki Tourists sha katei ka jaka hynrei da ka jinglah jong ki pulit ban kem ïa ka nongsylla bad kiba donkti ïa katei ka kam pynïapbriew, kan pynktik pynban ïa ki tourist ban nangtuid shuh shuh sha Sohra bad shawei. Ka ktien ka ong “Ka Hok ka kyntiew ïa ka Jaidbynriew”. Sa shisien, ngi salute ïa ka Meghalaya Police, Well done !.
