Bteng ka KVK ïa ka VKSA campaign halor ki hynñiew tylli ki rukom rep sha ki paitbah

Nongstoiñ, Jylliew 07: Na ka bynta ban pynshlur ïa ki nongrep ba kin trei shitom na ka bynta ban kyntiew ïa ka ïoh ka kot jong ki, ka ophis jong ka Krishi Vigyan Kendra West Khasi Hills kaba don ha Nongshillong ka dang bteng ïa ka jingleit ban pynshai sha ki paitbah ïa ka Viksit Krishsi Sankalp Abhiyan (VKSA), kaba dei ka prokram ba kyrpang na ka bynta ki nongrep ban pynsngewthuh ïa ka kam rep kam riang.
Ha ka jingleit pynshai sha ki paitbah nongrep, ka KVK ka la phiah ha ki lai tylli ki kynhun bad ha kitei ki kynhun la kynthup lang ïa ki Saïantis na ka ICAR, CAU bad KVK, ki ophisar na ki tnad treikam jong ka Department of Agriculture & Farmer Welfare, Animal Husbandry & Veterinary Department, Department of Fisheries ryngkat bad ki dkhot jong ki FPO, ba kin leit ban ïashim bynta lang ha ka ban pynshai sha ki nongrep.
Ha ka san tarik kitei ki kynhun ki la pyndep ban leit pynshai sha ki nongrep jong ki khyndai tylli ki shnong ba kynthup ïa ka Mawlangsu, New Mawlangsu bad Domkohmen ki shnong kiba hap ha ka Mawthadraishan C&RD Block Eastern West Khasi Hills.
Nalor kata ha katei ka juh ka sngi ki lai kynhun ki la leit ruh ban pynshai sha ki paitbah nongrep ha ki hynriew tylli ki shnong kiba hap ha ka Mawshynrut C&RD Block, kata ha Kriangrin, Khyllemsangrin, Umwali, Umwahlang, Nonglang bad Kyndongei.
Ha kane ka sngi thohdieng ka 6 tarik pat ki lait tylli ki kynhun ki la bteng ban leit pynshai sha ki paitbah nongrep ha ki shnong kiba hap ha Mawthadraishan bad Nongstoiñ C&RD Block ba kynthup ïa ka Myrïaw, Ramsiej, Nongshiliang, Wahliewlong, Mawlaisyiem, Laitkseh, Jaidoh, Marang bad Nongrimmawkhar.
Katei ka prokram ba kyrpang ba ka ophis jong ka Krishi Vigyan Kendra ka la pynïaid shakhmat, ka long ban pynshai sha ki paitbah nongrep ka long ban pynsngewthuh ïa ki halor ka VKSA Pre Kharift campaign, ka rukom rep da ka Integrated Farming System bad ki jingtip halor ka kam ri dohkha, ka rukom rep da ai dawai kaba la ju tip kum ka organic farming, natural farming bad ki jingdonkam ban bud ïa kane.
Ka rukom ai sboh dawai kat ban biang ban ïoh kham bun ka jingmih bad ban pynduna ïa ka jingktah ïa ka mariang. Ka smart farming da kaba pyndonkam da ki buit ICT bad ki tiar rep kiba kat kum ka juk ba mynta, ban pynshai ruh sha ki nongrep shaphang ki skhim sorkar kiba lah ban ïoh na ki tnad ka rep ka riang, ka ri jingri bad ri dohkha. Ka rukom pyndonkam ïa ki bio fertilizer and bio pesticides, ki dawai sboh bad kiwei kiwei.
Nalor kata kaba kham kongsan ka dei ka jingïakynduh mar khmat jong ki nongrep bad ki stad wad bniah shaphang ka rep ka riang, khnang ba ki lah ban pynpoi ïa ka rukom rep ba thymmai sha baroh ki kper jong ki nongrep na ka bynta ban btin lynti ïa ki nongrep ha kiba bun ki liang. Lyngba kitei ki lad ki nongrep ki lah ban wanrah ruh ïa ki jingai jingmut khnang ban pynbha shuh shuh ïa ka rep ka riang ban ban kyntiew ïa ka ïoh ka kot jong ki.
Ha kitei ki jingleit pynshai la sam ruh ïa ki kot lyngkdop kiba la thoh bad pynshai halor ka natural farming, nutri cereal, ki symbai kba bad riewhadem ba thymmai ki tunnel poly house kiba duna jinglut, ki kynja top ba dait thah (AAU) kiba kham jem ka dor, ki mashin kti ban ot shynrai, ki jait syiar Kalinga ba saw bthuh bad ba lieh, u jait sniang u ba la khot lum.
Ha kajuh ka por la pynshai sha ki nongrep shaphang ka jingri dohkha ha ki pynthor kba bad kiwei kiwei bad la sam ruh sha ki nongrep ïa ki symbai jhur ba bun jait.
Katkum ka jingpyntip na ka ophis jong ka KVK West Khasi Hills kaba don ha Nongshilong, la ong ba katei ka VKSA campaign kan dang bteng biang haduh ka taïew ban wan. Kumta la kyntu ïa baroh ki nongrep jong ki shnong kiba ka ophis ka la dep pyntip ba kin ïa wan ban sngap ïa ki jingpynshai na ka bynta ka jingmyntoi jong ki.