Baroh kiba la nang la stad bad kiba la pule ha kane ka juk mynta, naduh Sor haduh nongkyndong jong ka Jylla Meghalaya, ki la ïa tip ba ka jingpyndonkam ïa ki plastik ka long kaba ma ïa ka jingkoit jingkhiah. Hynrei wat la ïa tip bad ïohi pylleiñ pylleiñ ïa ka jingsniew, jingisih bad jingijli ban peit, pynban ngim kheiñ sniew eiei namar la ïa mlien, ïa myllen bad ym pyrkhat eiei ïa kata ka jingsniew ne jingma ïa ka jingim ne ïa ka mei mariang. Kumba ngi ïatip, ki plastik ki mih bad pyndonkam kiba ki jait-pa-ki jait ki don naduh kiba rit, ba stang, kiba rben bad kiwei kiwei ki jingheh (sizes). Hato, la ju pyrkhat jylliew ne em haba ngi ïohi ïa ki plastik kiba satah, kiba per ha ki sla um, kiba blok ïa ki nala, ki wahrit wahduid haduh ki pung ne ki nan bah kum ka wah umiam kaba ngi ïohi mynta ha kane ka por.
Ha ka jingshisha ïa ka jingpyndonkam ïa ki plastik la mana da ka Sorkar naduh ka 23 tarik ïaïong, 2001 da ka Jingpynbna (Notification) kaba la pynmih, kaba ong “Meghalaya Prohibition of Manufacture, Sale, Use & Throwing of Low Density Plastik Bags Act, 2001 (Act No. 4 of 2001)” kaba mana ban pyndonkam ïa ki plastik kiba ka jingrben ki dei ym duna ïa ka 50 micron. ïa kane ka Aiñ la pynkylla ha ka snem 2004 (Amendment Act, 2004). Kane ka Aiñ ka ong ba ka jingrben jong ki jait plastik kiba rah-jing-rah kim dei ban duna ia ka 50 micron lait noh kiba lah ban kylla um hi dalade ha ka khyndew. Hynrei kane ka aiñ ka long kaba ym pdiang da ki paidbah namar ka bor Sorkar kam lah ban teh lakam ne pynduh ïa ka jingpyndonkam ïa ki plastik. Ki paidbah ki lah ban pyni nia namar ka pyrthei baroh kawei, ki pyndonkam ïa ki plastik haba thied jingthied ïa kano kano ka tiar ne ki marbam mardih, te kumno lah ban khang tang hangne hapoh Meghalaya. Kim sngewthuh ïa kino ki jait plastik kiba bit ban pyndonkam bad kino ki bym bit ban pyndonkam. Kawei ruh ka dei ïa ki nongshna ne ki nongpynmih ki karkhana ne company ïa kine ki plastik. Ladaka Sorkar kam lah ban pynduh ne khang ïa ki nong shna ne karkhana plastik, ka long kaba eh ïa ki briew ban nym pyndonkam. Man la ki jingthied, ki nongdie bad ki trai dukan ki ai da ki plastik, kaba pynlong ïa ki briew ban nym pyndonkam shuh ïa ki pla jain.
Shipor, ngi la ïoh sngew ïa ka jingmana ka ban leh da kaba tyngeh ïa ki briew kiba pyndonkam ïa ki plastik bad la pynmih ruh ïa ki pla jaiñ ha ki ïew ki hat bapher bapher. Hynrei kane ka la long tang shipor. Mynta pat, la sdang beit da ki plastik. Ki plastik kiba ma ïa ka koit ka khiah bad ia ka mei mariang ki dei kito ki plastik kiba ym lah ban kylla um ne non-biodegradable plastik. Ha kane ka pyrthei plastik mynta, ka long, teng teng lah ban ong ba mangi ki nong thied bad ki nongdie ruh ngi ïa don bynta lang.
Shipor, la ïoh sngew ba ka la mih kata ka kynja mashin kaba lah ban pynpyut ïa ki plastik ne kata kaba ki ong, Solid Waste Management Plant, kaba da ka jingstad saïan, lah ban saiñ ïa ki plastik bad pynlong sboh. Ka la dei ka por ba da ka bor Sorkar kan leh eiei na ka bynta ban ïaleh pyrshah ïa ka jingpyndonkam ïa ki plastik namar ka long kaba ima haduh katta katta ïa ka jingkoit jingkhiah jong ki briew. Kine ki plastik ki ktah kylla ia ka jingim jong ki briew, hynrei ki briew kim sngewthuh, namar ngi ring mynsiem ïa ka jingpynmih jaboh jong ki. Ka long thik kum ka jingbym don shuh ki dieng ki siej kiba ym pynïoh shuh ïa ka lyer kaba khuid ïa ka jingim jong u briew bad ïa ka mariang. Lada lait ïalade, kam biang namar ngi dei ban pyrkhat ïa kiwei pat ki para briew,ïa ka lawei ki khun ki kti, ka jaidbynriew bad ka imlang sahlang.
Dangshen ka sorkar pdeng ka la bthah ïaki jylla bad Union Territory ba ki dei ban pynsangeh noh ïa ka jingpyndonkam ïa ki plastik. Kumta ka shong ha ki sorkar jylla ban pyrkhing bad pyntreikam ïa ki aiñ ba la don lypa khnang ba ki paidbah kin ym ïoh shuh ban pyndonkam ïa ki plastik hapoh ki jylla
