Shillong, Jylliew, 20: Ki nongïalam jong ka All NEHU Workers Union (ANWU) ha ka lah sngi U Blei ki la leit ban pynsngew hakhmat u Lat ka Jylla u Satya Pal Malik halor ka jingdawa ïa ki bor pynïaid jong ka skulbah North Eastern Hills University (NEHU) ban thungkam pura ïa ki nongtrei sngi bad ki nongtrei kontrak kiba la shakri da ki phew snem ha kane ka skulbah.
Ha ka jingïakren bad ki lad pathai khubor, u President ka ANWU u Bah Napoleon Mawphniang u la ïathuh ba ha ka jingïakynduh ïa u Lat ka Jylla ka seng ka la ïohlad ban pynsngew ïa ka jingeh jong ki san spah ngut tam ki nongtrei bylla sngi bad kiba trei kontrak hapoh ka skul bah NEHU kiba don ha Shillong bad ha Tura.
U la ïathuh ba Union ka la pynpaw hakhmat u Lat ka Jylla halor ka jingbym lah jong ki bor pynïaid ka skulbah NEHU ban ai jingithuh ïa ki nongtrei sngi bad ïa kiba trei kontrak kiba la trei palat 10 snem bad nalor kata la lap ruh ba ki don ki nongtrei ki bym pat kot shiphew snem ki la ïoh ïa ka jingithuh kum ki nongtrei bapura bad kane ka la pynsuba sniew ïa ki bor pynïaid jong ka skulbah.
“Ngi la ïohlad ruh ban pynsngew ha u Lat ka Jylla ïa ka jingrit shaba palat ka jingsiew tulop kaba shong dor tang T. 400 tyngka shi sngi ha kane ka pyrthei rem ha kaba ka bainong ka la lut tang ha ka bai kali. Ngi la kyntu ruh ïa u Lat ba un ïa kren lem ïa kane ka jingeh kaba ki nongtrei sngi bad nongtrei kontrak ka NEHU ki la ïa kynduh,” u la ong.
Shuh shuh u la ïathuh ba ka ANWU ka la pyntip ruh ha u Lat ïa ka jingleh bym suidniew jong ki bor pynïaid ka NEHU namarba ïa ki long kmie kiba ïoh khunlung ruh ym shym la shah ban shim shuti bad lada ki pep ha kum kane ka por ki shah weng syndon na ka kam bad nalor kata ki don ruh kiba la trei jin haduh 25 snem haba khladnoh u ne ka nongtrei kim ïoh bujli shuh ïa ka kam.
U Bah Mawphniang u la ïathuh ba u Lat ka jylla u la shah skhor ïa kane ka jingud jingnam jong ka ANWU bad u la kular ba un sa ïa kren bad ki bor ba dei peit ïa kine ki jingeh kaba ki nongtrei sngi bad nongtrei kontrak ha kane ka skulbah ki la ïa kynduh jingeh.
