28 ngut kiba ïap, palat 5 lak shah ktah na ka jingshlei um bad twa khyndew ha Meghalaya

Shillong, Jylliew, 19: Ka jingshah lynshop jong ka Jylla Meghalaya ha ki bor ka mariang ha kane ka aiom lyiur kaba la sdang naduh ka 1tarik, Ïaiong, 2022 ka la ktah haduh katta katta kat haduh ba ki paidbah ki la im rit mynsiem.
Katkum ka jingai jingkheiñ jong ka State Disaster Management Authority ka Sorkar Jylla haduh 11 tylli ki District ki la shah ktah. Kine ki kynthup ïa ka East Khasi Hills, ka West Khasi Hills, ka South West Khasi hills, ka Ri-Bhoi, ka East Garo Hills, ka West Garo Hills, ka North Garo Hills, ka South Garo Hills, ka East Jaiñtia Hills bad ka West Jaiñtia Hills.
Ki shnong kiba la shah ktah haduh mynta na ka jingshlei um bad na ka jingtwa khyndew ki long haduh 822 tylli bad haduh 5,86,434 lak ngut ki paidbah kiba la shah ktah ha kane ka jingwan lynshop jong ki bor ka mariang.
Kat haduh ka sngi U Blei, ka Jylla Meghalaya ka la sakhi haduh 28 ngut ki briew kiba la duhei ïa la ka jingim na ka jingtwa khyndew.
Ha kine ki jingjia, haduh 8 ngut ki briew kiba dang jah rngai ha ka jingtwa khyndew bad ha ka jingshlei um ha kylleng ka jylla bad haduh 20 ngut ki briew ki la mynsaw jur.
Ki don haduh 50 tylli ki shnong kiba la shah ktah hapoh ki arphew saw kynta ba la leit noh bad 435 ngut ki briew kiba la shah ktah. Mynta ka sngi u Blei la ai jingkheiñ ba u don tang uwei uba ïap.
Ki ing ba la shah pynjulor hapoh kine ki arphew saw kynta ki long 28 tylli, kata, 4 tylli kiba la shah pynjulor ha ban da pra phom, 3,455 tylli kiba la kham julor bad 6 tylli kiba la shu pra malu mala.
Ka jingshah ktah ki hali, ki pynthor bad ki jaka thung mar rep tang ha ki 24 kynta ba la leit noh ka long 0.87 hektar.
Ka jingshlei um na ka jingther jong u lapbah uba jur ka la pynjulor ïa kiba bun ki iing ki sem, kata haduh 3,455 hajar tylli.
Ki lanot kiba la shah pynkynriah sha ki jaka sah ba shipor ki long 4142 hajar ngut kat haduh mynta ka sngi u Blei.
Ka jingshah ktah jong ki mar rep ka long 28 hektar na ka jingshlei um.
Ha ki 24 kynta ba la leit noh, ka jingther u lapbah, ka jingtwa khyndew bad ka jingsyllad ka eriong ka la jia ha South West Garo Hills.
Ha Ampati haduh 12 tylli ki Anganwadi Centre ki la shah ktah bad 2 tylli ki Anganwadi ki la shah pynjulor ha Zikzak C &RD Block.
Ka surok ka PWD (Road) Mahendaraganj Sub-Div, Ampati Division, Ampati Civil Sub Division kaba pynïasoh na Dinanpara lyngba ka Kebolpara ka la shah ktah.
Ha East Jaiñtia Hills District, mynta ka sngi u Blei la ïoh jingtip ba uwei u la khladnoh ha Lumshnong bad ïa ka kaiphod ym pat ïoh satia.
Ha West Khasi Hills, kawei ka jaka kaba hap hapoh ka Mawthadraishan Block ka la shah ktah.
Ha West Garo Hills Tura kawei ka Channel hapoh ka Dadengre Block ka la shah ktah. Ka surok Nongstoiñ- Nongdaju sha Darrengre Road ka la shah ktah na ka jingtwa khyndew bad ka jingtwa ki kynroh Rel.
Ka jingkhlaiñ jong ki lat lat ka umbah ka la rong ïa ka jingkieng ha Riangdim.
Ka Sorkar Jylla ka la phah 12 ngut ki Pulit SDRF sha South West Garo Hills District ban ïarap ïa ki briew kiba la shah ktah ha ka jingshlei um.
Ka Sorkar ka la phah da ki Pulit ban ïarap ïa ki briew kiba shah ktah ha ka jingtwa khyndew ha East Jaiñtia Hills District bad buh ruh kawei ka lieng ha South West Garo Hills District ban ïarap ïa kiba la shah ktah na ka jingshlei um.
U Myntri Rangbah ka Jylla u Conrad Kongkal Sangma u la pyntip ba un sa ïakynduh ïa u Myntri ka tnat Kam Pohing ka ri u Amit Shah ban ïakren halor kane ka jingshah ktah jong ka jylla Meghalaya na ka jingshlei um bad na ka jingtwa khyndew.
Dang shen u Conrad Sangma u la ïakynduh ïa ka Myntri ka tnat Pla Tyngka ka Nirmala Sitharaman ban pan jingïarap pisa ha kaba ïadei bad ka jingshah lynshop ka jylla Meghalaya ha ki bor ka mariang.
U la pyntip ruh ba ka jingther jong u lapbah uba jur ha Meghalaya ka la wanrah ïa ka jingjulor kaba jur bha na ka jingshlei um kaba la ktah ïa ki jingthung jingtep, ïa ka rep ka riang, ïa ki iing ki sem jong ki paidbah nongshong shnong, ïa ki jingri jingdub bad kiwei kiwei.