Nongstoiñ, Jylliew, 19: Ka dei ka sien ba nyngkong bad ka jingsngew sarong, ba kawei ka skul shimet kaba la tip kum ka NeIPS Secondary School kaba don ha Upper New Nongstoiñ West Khasi Hills District, ha kaba kawei ka khynnah skul ka bym nang kren bad ka bym ïohsngew, kaba la tip kyrteng kum ka Khularis Mawlieh ka khun jong ka kong Bleris Mawlieh na ka shnong Mawkhmahwir, ka la pas bha ha ka Secondary School Leaving Certificate 2022 ha kaba ka la ïoh haduh 61.2 % ha ka total marks.
Napdeng ki phra ngut shi para dei tang ma ka, kaba la pyndep ïa ka eksamin SSLC watla ka don ha kaba kum katei ka jingeh ruh. Katkum ka jingïathuh jong ka kmie, la ong ba ka khun jong ka naduh dang kha, ka don ka jingshitom kaba phylla namar kam lah ban ïeng ne ban ïaid. Ha ka jingkyrduh, ka la shu thied noh tang shi bilor ka dawai kyllan bad man ka step mar shu mih ka sngi ka pynshong ïa ka khun jong ka ha baranda ban phah syaid sngi haduh ka por phra baje ei ei. Ka la ïathuh ruh ba dei tad haduh ba ka la dap khatlai snem ka karta, ba ka la sdang ban ïeng bad ban ïaid.
Ka kong Mawlieh ka la ïathuh ruh ba ka la sdang ban phah skul ïa katei ka khun ha ka klass A ha Fernando skul ha Barapani, haba ka la dap khatsaw snem duna ka karta bad ka la pule ha katei ka skul haduh matrik. Hynrei ha ka selection test kam shym la pass kumta ka la leit shaw noh ïa ka bad wan ïalam noh sha shnong.
Ka la ong ruh ba haba ka la don ha shnong ruh, kam sngew hun ban shu pynsangeh noh namar man ka sngi katei ka khun ka kyntu ba kan phah skul biang. Kumta ka la pyrshang ban wad skul ha Nongstoiñ bad ka la ïoh ban pynrung ha ka NeIPS Secondary school ha Upper New Nongstoiñ.
Wat haba ka la ïoh rung ha katei ka skul kam shym la poi pyrkhat ba kan pass ha ka Final, namar kam ïoh sngew satia haba hikai bad kam nang hi ruh ban kren. Ka la ong ruh ba dei tad haduh ba la pynbna ïa ka risol matrik ba ki sa tip ba ka khun jong ka ka pass bha. Haba kylli pat na katei ka khynnah ba ha kano ka rukom ba ka la lah ban pas bha ïa ka exam matrik, ka la shu pyni da ki kti ba ka jingpas bha ka dei da ka jingminot thop bad trei shitom da kaba pynleit jingmut haba khreh ïa ki notes ba la ai da ki nonghikai ha skul.
Ka la pyni dak ruh ba ka ai khublei ïa ki nonghikai baroh kiba la trei shitom met bad mynsiem ban btin lyni ïa ka, haduh ban kan da poi sha ka thong jong ka jingjop kumba ka la angnud bad ka la thrang naduh ka dohnud. Nalor ka lianb ka kmie ka la ïathuh ba ka kwah ban phah bteng biang ïa ka khun ban leit pule, hynrei ban phah sha kiwei ki skul kam sngew don lad satia, namar ka jingduk jingkyrduh. Watla katta ruh ka la ong ba kan phah bteng biang ïa ka khun ba kan leit pule ha katei ka juh ka skul katba ka dang lah ban kyrshan.
