Khynra ka ED ha South Garo Hills bad Assam ïoh kurup pisa 1.5 klur,kynnoh ba donkti ki Ophisar bad Riewsaiñpyrthei

Shillong, Jymman 17 : U Nongïalam ka Liang Pyrshah uba dei ruh Myntri Rangbah ba rim ka jylla u Dr Mukul Sangma u la dawa ban thung da ka jingtohkit ba laitluid ban tohkit halor ka jingtih dewiong beaiñ pathar ha ka jylla Meghalaya. ïa kane u la dawa hadien ba ka Enforcement Directorate (ED) ka la lap sabut ba ka jur ka jingtih dewiong beaiñ ha ka jingkhynra jongka ha ki 20 tylli ki jaka ha South Garo Hills bad Assam.
Ha ka jingkhynra ka ED ka la ïoh ban kurup 1.5 klur ka pisa, ki kali remdor, ki kot ki sla kiba pynpaw ïa ki briew kiba ïadonkti. U Dr Mukul u la kynnoh ba ha kane ka kynhun la ïadon lang naduh ki Ophisar, ki Riewsaiñpyrthei bad ki Nongkhaïi beaiñ.
U Dr Mukul u la kynthoh pyrshah ïa ka sorkar Meghalaya kaba ym shym la leh ei ei da kaba ong ba ki bor synsar ki leh bym suidniew ïa kane ka kam wat hadien ba la ujor la bun tylli ki Ejahar ne FIR ruh. “ Ka kynhun ED ka la lap sabut kaba biang ïa kane ka jingtih dewiong beaiñ bad ka jingshalan beaiñ ïa u dewiong bad kane ka la buh ruh ïa u dak jingkylli uba khraw kumno ki bor pulit kim leh ei ei wat haba ki ïohi pylleiñ pylleiñ ba la leh ïa kane ka kam man la ka sngi ruh.
U Dr Mukul u la buh jingkylli ruh balei ba ka jingtohkit halor ki FIR ka suki palat. “ Lada ka ED ka lah ban lap ïa ki sabut kiba biang balei ki pulit kim lah?” kylli u Dr Mukul da kaba kynnoh ruh ba wat u Myntri Rangbah ruh u len im im peit peit ïa kane ka jingdon ka kam tih dewiong beaiñ ha ka jylla.
U la ong kane ka jinglap ïa kane ka jingtih dewiong beain ka pynpaw ia ka jingïadon kti lang ki Riew Saiñpyrthei bad ki Ophisar sorkar. “ Dei kito kiba don ha ka bor kiba pynïaid ïa kane ka kam bad kumta ka donkam ïa ka jingtohkit ba laitluid ban lap ïa ki jingshisha baroh” ong u Dr Mukul.
U la ong ruh ba ka kam tih dewiong ka hap hapoh ka jingpeit ka sorkar pdeng kumta ka sorkar pdeng ka dei ban leh ei ei halor kane.U la ai jingmut ban bud dien ïa ka kam khaïi dewiong da ka rel na Jogighopa bad Dudhnoi.
“ Nga ngeit skhem ba kane ka kam kan ym ïaid shakhmat lada ym ïadon kti kito kiba don ha ka bor” ong u Dr Mukul. Namar kane ka jingïadon kti ki Riewsaiñpyrthei bad ki Ophisar kumta donkam ban thung da ka jingtohkit ba laitluid ban paw ki jingshisha baroh, pynkut u Dr Mukul.