Nongpoh, Jymmang 15: Ban ïalap pyrshah na ka jingktah jong ka jingbam ne dih duma bad kaba long ruh shi bynta ban rakhe ïa ka World No Tobacco Day, ka Alpha English Higher Secondary School, Nongpoh mynta ka sngi ki la rakhe ïa kane ka sngi da ka jingïaid paidbah ki khynanh skul bad ruh ka jingïalap halor ka jingma kaba ktah ïa ka koit ka khiah lyngba ka jingdih ne bam duma.
La sdang ïa kane ka jingïaid paidbah na katei ka skul ban ïaid lyngba ka sor Nongpoh, ha kaba ki khynah skul ryngkat ki nonghikai ki la rah ïa ki placard bad ki jingthoh ban ïalap sha ki paidbah ban sangeh ka bam ne dih duma, namar ka jingbam bad ka jingdih duma ka ktah ïa ka koit ka khiah jong u briew.
Ha kane ka sngi, nalor ba la leit ban ïalap ïa ki paidbah lyngba ka jingpyrta ha ka surokbah ban ïalap na ka jingktah ka jingbam ne dih duma, la pynlong ruh ïa ka jingai jinghikai na ka bynta ki khynnah skul ba ki hap ban kiar raimaw raidieng ban dih ne bam duma.
Haba kren ha kane ka sngi, ka Kong W.K Blah kum ka Principal katei ka skul, ka la ong ba ka daw kaba la pynlong ïa ki bor pynïaid ka skul ban rakhe ïa kane ka World Tobacco Day ka long shi bynta ban pynsngewthuh halor ka jingshah ktah na ka bam bad dih duma, ha kaba ka skul ka don ruh ka jingsngewkhia lada shah ktah ki khynnah skul.
Ka la ong ruh ba ngi tip shai ba ka jingdih ne bam duma ka long shisha ka jingma ym tang ïa kiba la heh la san bad khamtam ki khynnah kiba dang rit ka rta, ha kaba ngi donkam ban pynsngewthuh khambha ba kin sngewthuh ïa kata ka jingktah u duma ba bun na kiba pang ba shitom ka daw kaba hakhmat ka dei ka jingkyrni ha ka jingdih ne bam duma.
Namarkata, kum ka bor pynïaid jongka skul kin dang ïai pyrshang ban ïalap halor ka jingktah u duma bad ha kajuh ka por ka buh ruh ka jingkyrpad ban ïa don kata ka jingïatrei lang na ka bynta ban pynsngewthuh paidbah bad khamtam ngi hap ruh ban don kata ka jingkitkhlieh ym tang ïa ki rangbah hynrei ruh kiba dang rit ka rta ba kim dei ban ktah ïa u duma.
