Shillong, Jymmang 15: U Myntri Rangbah ka jylla u Conrad K Sangma, ha ka sngi Palei u la plie ïa ka national seminar kaba ar sngi halor ka phang “His Footprints In Time: Trailblazers of Meghalaya In The Making of Modern India,” ba la pynlong da ka Centre For Historical Research Synod College (CHRSC), Shillong. Ha kane ka sngi la donlang ruh u symbud kongsan uba dei ruh u Member of Parliament, u Dr W R Kharlukhi.
Haba kren ha kane ka sngi na ka liang jong u Myntri Rangbah u la ong ba ka Synod College ka la long barabor kaba hakhmat ha ka ban pynlong ïa ki seminar kiba donkam bha na ka bynta ka bha ka miat ki samla pule bad ka imlang sahlang. “Kane ka seminar kan kren ym tang shaphang ki jingim hynrei shaphang ki jingim kiba la ktah, kiba la ai mynsiem ha ki sngi ban wan.”
U Myntri Rangbah u la banjur ruh halor ki jingdonkam ban buh ha ki jingthoh ïa ki kam wadbniah bad kiwei kiwei. U la pyntip ruh halor ka Chief Minister’s Research Grant kaba ïarap ïa kiba wadbniah ba kin pyndep ïa la ki jong ki kam jong ki.
Ha kane ka sngi ka la don ruh ka jingpynkup burom ïa ki dkhot kiba la shakri ha ki kam imlang sahlang, ka pule puthi, ka kam saiñ pyrthei bad kiwei kiwei.
