Shillong, Jymmang 14: U Nongïalam ka United Democratic Party (UDP) uba dei ruh u nongïalam ka Liang pyrshah ha KHADC Bah Titosstarwell Chyne ha ka sngi Balang u la ong ba ka Party ka lah ban leit sha ka jingïalang jong ka All Party Committee hynrei ka dang bat ïa ka nongrim kaba skhem ban pyrshah ïa ka project lynti rel kat bym pat don ki lad jingïada kiba khlaiñ ban tehlakam ïa ka jingwan rung beaiñ ki briew nabar ka Jylla.
Ha kaba iadei bad kane haba kren sha ki lad pathai khubor u Bah Titos u la ong, “Ban long shi bynta jong kano kano ka jingïalang ban ïathir nga tharai ba ka Party kan mynjur ïa ka.”
“Hynrei ngin sa rai kum ka Party. Ngim lah ban rai tang kum u President ne General Secretary marwei ha kaba ïadei bad kane ka kam. La ngin ïa don bynta ne em ha ka jingïalang jong ka All Party Committee, ïa kane ngin sa rai ha ka jingïalang jong ka Party ka ban long ha ka taïew ban wan,” u la ong.
U Bah Titos u la ong ba ka Party ka dang bat ïa ka nongrim kaba skhem ban pyrshah ïa ka lynti rel kat bym bym pat don ki aiñ ba pyrrkhing ïa ka jingwan rung beaiñ ki briew sha ka Jylla.
“Kawei na ka nongrim kaba skhem ba ka UDP ka ïeng ka long ba ngi pyrshah ïa ka lynti rel namar haduh mynta ym pat don ki aiñ ban peit ïa ka jingwan rung beaiñ ki briew shapoh ka Jylla Meghalaya. Dei na kata ka daw ba ngi la pyrshah jur ïa ka lynti rel,” u la pynpaw.
