Nongpoh, Jymmang 14: Ka skul Alpha English Higher Secondary School, kawei naki skul ba paw haka thaiñ Nongpoh mynta ka sngi kala ioh ban plie paidbah syndon ïa ka madan basketball ba paka ha phyllaw jong katei ka shlem pule, ba ki khynnah kin ioh ban kilan bala mang pisa haduh T.5 Lakh lyngba ka skhim SRWP bad haka juh ka por la plie ruh ïaka SS Blah Memorial Basketball Tournament.
Ïa katei ka madan ïalehkai la wan ban plie paidbah da u Bah Mayral Born Syiem MLA ka Nongpoh kum u kongsan haka jingdonlang ka L Marak JRDO Umling C&RD Block, ka kong WK Blah Principal, Pr. (Dr) KB Kharbteng Vice Principal, ki nonghikai lem bad ki samla pule jong katei ka skul.
Ha katei kajuh ka sngi naka liang ki bor pynïaid skul kila pynkup burom ruh ïa ki samla pule kiba la pass bha haka eksamin SSLC bad HSSLC mynta u snem kaba la wanrah nam bad burom ïaka skul.
Haba kren ha katei ka sngi naka liang u Bah Mayral Born Syiem MLA ka Nongpoh, u la ai ka jingkhublei ba kyrpang ïa baroh ki samla pule kiba la pass bha haka eksamin SSLC bad HSSLC kaba dang shu dep mynta u snem namar ki don ruh ki samla kiba la ioh rung haka top 20 jong ka Result SSLC, kaba long ka burom ïaka skul baroh kawei.
U la kyntu ruh ïaki samla pule ha katei ka sngi ba kin nang iai minot bad leh tipsngi haka jingim jong ki ba man ka sngi ba kin longbriew man briew hadien habud namar dei tang ki khynnah kiba minot bad kiba trei shitom kiba poi sha kliar lum jong ka nam.
U Bah Mayral Born u la pynpaw ruh ka jingsngewkmen ba ha katei ka juh ka sngi la ioh ruh ban plie paidbah syndon ïaka madan ïalehkai Basketball jong ka skul kaba kum u MLA u la shimkhia ban pynmang skhim naka SRWP bad kyrmen skhem ba katei ka madan kan long ka jingkyrkhu bad ka jingmyntoi ïaki khynnah jong katei ka skul ba kin ioh ban pyndonkam ban kilan bad ki prokram bapher bapher.
