Nongstoiñ, Jylliew 19: Namar ka jingnang hiar dor jong ka akor ka burom ha ka imlang sahlang, ka jingsuki jong ka jingpyntrei ïa ki kam pynroi bad ka jingeh jong ki samla ha ka ïoh kam lem bad kiwei kiwei, ki riew rangbah jong ka thaiñ Nongstoiñ ba kynthup ïa ki nonghikai skul, ki nongtrei kam sorkar kiba la shong thait, ki la rai ban thaw noh da kawei ka synjuk ba kyrpang kaba la tip kum ka West Khasi Hills Senior Citizen Association.
Kine ki riew rangbah ki long kum u Doctor P.Lyngkhoi u ba la shongthait na ka kam kum u Joiñt Director ka tnad ka koit ka khiah, u bah Denestar Pariong pulit ophisar ba la shong thait, u babu Genes Thyrniang u ba la shongthait na ka kam District Mission Coordinator jong ka tnad pule puthi jong ka sorkar, u bah Tlidingstone Wanñiang MDC barim ka Nongstoiñ, u bah J.G.Rynñiaw MDC barim ka Mawshynrut, ki Junior Engineer bad Gramsevak ba la shong thait, ki sordar shnong ka thaiñ Nongstoiñ, ki longkmie kiba la rangbah bha bad kiwei kiwei.
Ha ka jingshisha ïa kane ka synjuk ka ban peit kyrpang ïa ka khia ka shon ha ka imlang sahlang ha ka thaiñ Nongstoiñ, la thaw ha ka 30 tarik Ïaïong 2022 bad ka ‘tien phira jong katei ka kynhun ka long “We are born to live and to serve”, kaba mut la kha ïa ngi ban im bad ban shakri.
Ha katei ka sngi la pynïaid ïa ka jingïalang da u Doctor P.Lyngkhoi u ba dei ruh u President jong katei ka kynhun, ha kaba la pynsngew ïa ki kyrteng jong ki nongkitkam da u bah Tonington Tyrsa u ba dei u General Secretary. Hadien ba la pynsgew ïa ki nongkitkam bad ki dkhot, la pule ïa ka riti treikam da u President.
Ki Nongkitkam ba hakhmat kiba la pynsgew ha katei ka sngi ki long President Dr P.Lyngkhoi, Vice President babu K.K.Lynser, Working President bah Denestar Parïong, General Secretary bah Tonington Tyrsa, Assistant Secretary bah T.M Lawriniang bad bah M.S Kharbani, Publicity Secretary bah F.Marweiñ, Spoke Person bah Tlidingstone Wanñiang bad Treasurer bah N.Syiemlieh lem bad hynñiew ngut ki Executive Member.
U bah Tlidingstone Wanñiang spoke person ka synjuk, haba ïakren bad ki nongthoh khubor hadien ba la wai ka jingïalang, u la ong ba ka jingthmu jong katei ka kynhun, ka long ba nangne shakhmat kan peit bniah ïa ki jingeh bad ki jingïaleh ba bun jait hapoh ka dong ka thaiñ hi baroh kawei.
