Sdang paw ki khynnah ka Raidmynsaw Secondary School, 99% kiba pas ha ka SSLC 2022

Nongstoiñ, Jylliew 19: Ka Raidmynsaw Secondary School, ka dei kaba dang shu sdang ban seng ha u snem 2017 bad ka dang jam mynta tang san tylli ki maw mer jong ka jingïaid lynti, ha ka ban saiñ dur ïa ka jingnang jingstad ha ki khynnah jong katei ka thaiñ.
Nalorkata dei tang ki nongpynïaid bad ki nongseng jong katei ka skul, kiba la pynpaw pyrthei shisha ïa ka jingangnud bad ka jingthrang ba ki khun ki ksiew jong ki, kin ïoh ïa ka jingnang jingstad da kaba pule ha la rympei bad kiba la mad ïa ki jingjynjar bad ki jingeh ban ïaleh pyrshah da ka bor jong ki paitbah, ïa ka jingwan thom bor jong ki pulit Assam ha ka por ba shna ïa ka ïing skul.
Ha ka por ba u (L) Dr Donkupar Roy u dang long u Myntri Rangbah jong ka jylla, ha ka sorkar Meghalaya Progressive Alliance (MPA) da ka jingsngewkhia ïa ka jingud ki paitbah ka thaiñ, u la ai jingïarap na ka Chief Minister’s Fund ban shna ïa katei ka ïing skul. Hadien ba la pyndep, ki riew rangbah bad ka Raidmynsaw ki la phai khmat ban pyrshang plie sa ïa ka Secondary school haduh class VIII bad ha u 2017 ki la sdang sa ïa ka class X.
Naduh ba la sdang ïa ka class X, ki nonghikai ki la trei shitom met bad mynsiem ban kyntiew ïa ki khynnah ha ka jingpule, ha kaba suki suki ka skul ka la nang roi bad une u snem ba mynta, u dei u snem ban pynsah jingkynmaw, namar ka skul ka la phah shiphew ngut ki khynnah class X sha ka Final Exam ka Secondary School Leaving Certificate 2022 ba la pynlong da ka MBOSE, ha kaba khyndai ngut ki la pass bad tang iwei I ba pheil.
Na kitei ki khyndai ngut kiba pass ki don kiba poi 1st division bad ki sobjek ba ki ïoh distinction. Ki khynnah kiba wan shakhmat ki dei ka Pinky Sharma 1st division da kaba ïoh 70.83% ha ka total marks bad la ïoh distinction ïa ka Health bad Mathematics. Kiba poi 2nd division ka Pranita Sharma 59.33% distinction ha ka Health, ka Deveraj Sharma 56.33% distinction ïa ka Health, katba ka Rebina Samakha 49.50 %. Nalor kitei ki saw ngut kiba pass ki dei ka Neha Rai ka ïoh 43.50%, Subhash Subba, Ganga Rai, Demolin Thongni bad u Sunil Subba.
Ha kaba ïadei bad ka jingpass bha jong ki khynah mynta u snem, ki nongpynïaid bad nongseng jong katei ka skul ryngkat ki riew rangbah ka thaiñ, ha ka jingïadonlang jong u bah K.P.Pangñiang MDC & MLA barim ka Rambrai Jyrngam Constituency, ha ka sngi thohdieng jong ka taïew ba la dep, ki la pynlong ïa ka jingïakynduh lang ban pynkup burom ïa kitei ki khynnah ha katei ka skul, ha kaba la ïadon ryngkat ruh da baroh ki nonghikai, kmie ki kpa, ki dkhot ka Managing Committee bad ki khynnah skul.
Ha katei ka sngi la pynïaid ïa ka jingïalang da u bah Hindro Samakha, u ba dei u Chairman ka Managing Committee bad la ïoh ïa ka jingkren na ki kmiew ki kpa bad ruh na ka Kong Daïateilin Pangñiang M.A B.ed, kaba dei ka Headmistress jong katei ka skul.
U bah K.P.Pangñiang haba ai jingkren ha katei ka sngi, u la ai ka jingkyrkhu kyrdoh bad ai mynsiem ïa ki nonghikai, kiba la trei shitom met bad mynsiem ban kyntiew ïa ka jingnang jingstad ïa ki khynnah. U la ai khublei kyrpang ïa ki khynnah kiba la trei shitom bad kohnguh ïa ki nonghikai bad ïa ki kmie ki kpa kat haduh ba kin poi sha ka jingjop.
U la ong ruh ba ka Raidmynsaw Upper & Secondary School kam dei tang ka shlem ban saiñdur ïa ka jingnang jingstad ha ka thaiñ. Hynrei, ka dei ruh ka shlem kaba kongsan tam ban wanrah ïa ka jingïatylli, ka jingïalong kawei bad ka jingsngew shipara hapdeng ki Khasi bad ki Nepali.
U la ong ruh ba lada ki Khasi bad ki Nepali ki la ïalong shi tylli bad ka jingïaieit kum shi para ka la treikam, ka sorkar Assam kam don jaka shuh ban wan tuklar ne pyndik ïa ki nongshong shnong ha katei ka thaiñ. U la kyntu bad ai mynsiem ïa ki khynnah skul, ba ki dei ban long kiba trei shitom bad kiba minot thop ha ka jingpule, namar ha kane ka juk ba mynta lada ki dei kiba riewspah katno katno lada kim don ïa ka kyrdan pule kam don jingmut satia.
Ha kajuh ka por u la ong ba ïa ka spah ka phew ki nongtuh ki dang lah ban tuh. Hynrei ïa ka jingstad yn ym don ba lah ban tuh lano lano ruh bad ka jingnang jingstad ka dei ruh ka waitlam ban ïada ïa ka ri bad ka jaitbynriew.