Lum lang u Lat ka Jylla ïa baroh ki nongïalam niam bad ki Jaidbynriew bapher bapher

Shillong, Jymmang 10 : U Lat ka jylla, u CH Vijayashankar ha ka sngi Saitjain u la khot ïa ka jingïalang kaba kyrpang ha Raj Bhavan ïa ki nongïalam Niam bad na ki Jaidbynriew bapher bapher ban pynpaw ïa ka jingïatylli bad ka jingïalong kawei ha ka Ri haph ka Operation Sindoor.
Ha kane ka jingïalang kaba kyrpang ha Raj Bhavan, Shillong, la sakhi ïa ka jingïashim bynta na ki nongmihkhmat jong ki katto katne ki kynhun niam, kynthup ïa u Nabha Bhattacharya – Vice President ka Meghalaya All Faiths Forum bad u President ka Central Pooja Committee, Shillong, u Rev. Ellizer N Sangma ba dei Pastor jong ka Garo Baptist Church, Rev GPL Gadew jong ka Presbyterian Church, Shillong, Bah Ganesh Dkhar dkhot ka Seng Khasi, Sayidullah Nongrum ba dei President jong ka Meghalaya Muslim Forum, Dr. Shngain Pyrbot ba dei u General Secretary, Seinraij, Shillong, Fr. Staibok Warjri na ka Balang Catholic ba mihkhmat ha jaka jong u Archbishop Victor Lyngdoh bad ruh ki nongïalam kiba mihkhmat ïa ka Balang Presbyterian ha Khasi bad Jaintia, Garo Baptist Church, Ramakrishna Mission bad ka Archdiocese Shillong.
Ha kane ka jingïalang la shim bynta lang ruh da u Myntri Rangbah ka Jylla Conrad K Sangma kumjuh u Symbud Myntri Rangbah na Delhi lyngba ka virtual mode.
Haba kren ha ka jingïalang u Lat u la pynpaw ïa ka jingsngewnguh kaba khraw ïa ka jingwan jong ki ha kum kane ka por kaba lyngkot. U la pynrem jur ïa ki kam lehnoh la ka long ha ka ri India bad ha ka pyrthei baroh kawei, bad u la ïaroh ïa ki nongïalam ba kynja mynsiem na ka bynta ka jingkyrshan lang jong ki ïa ka jaidbynriew. Ha kum kane ka por, u Lat u la pynksan ïa ka bynta kaba kongsan kaba ki nongïalam niam bad ki nongmihkhmat jong ka imlang sahlang ki lah ha kaban wallam ïa ka jingïatylli ha ka imlang sahlang bad ban pynneh ïa ka jingsuk. U la kyrpad ïa iwei pa iwei i nongshong shnong, khlem da khein ïa ka niam ne ka kolshor, ban ieng tylli ha kaba pynneh ïa ki nongrim jong ka jingburom markylliang, ka jingieit ri, bad ka jinglong trai ri.
U Lat u la pynthikna ba la shim ïa baroh ki lad ki lynti ban pynneh pynsah ïa ka suk ka sain ha Meghalaya bad u la pynpaw biang ba ka bor jong ka India ka shong ha ka jinglong jong ka synshar paidbah, bad ba ka khubor jong ka jingsuk ka dei ban jop halor baroh. U ong ruh ba ha kine ki por kiba eh, ka long kaba kongsan ïa baroh ki jaitbynriew ban ïawan lang, ban pynskhem biang ïa ki jinglong kawei bad ban ïatreilang ban pynthikna ba ka jinglong kawei kan ïai neh.
Na ka liang u Myntri Sorkar ba dei peit ïa ka tnad pule puthi u Rakkam A. Sangma u la ong ba ka Ri ka dei jong baroh ki nong India bad da ka jingkyrshan jong ki paidbah, ka sorkar kan poi sha ka thong. U la kyntu ïa ki paidbah kiba don ha kane ka sngi ban duwai na ka bynta ki shipai. Katba na ka liang u Myntri ka tnad Bording u AT Mondal ula ong ba ki kam lehnoh ha kano kano ka dur kim don jaka ha ka ri.
U symbud myntri rangbah ka Meghalaya u Shri Donald Wahlang haba ai jingkren ha kane ka jingïalang u la ban jur ïa ka jingdonkam jong ka jingïatylli ka jaitbynriew da kaba ong, “Ka dei ka jaitbynriew kaba wan nyngkong.” U la pynsngew ruh ïa ka jingai khublei ka sorkar ïa u Lat ka jylla bad ïa baroh kiba la ïa poi ha kane ka jingïalang halor ka jingwan jong ki.
Katba na ka liang u Chief Secretary kaJylla, Bah Donald Wahlang u la banjur halor ka jingdonkam ka jingïatylli bad jingïalong kawei ha ka ri.
“Kadei ka Ri kaba wan nyngkong,” u la ong. Nangta u la pynpaw ruh ka jingsngewnguh na ka liang ka sorkar ïa u Lat ka jylla bad ïa baroh kiba la poi lang ha kane ka sngi.
Baroh kiba poi ha kane ka jingïalang kumjuh ki heh sorkar ki pynrem jur ïa ka jingshah thombor ha Pahalgam bad ki ai ka jingkyrshan kaba khlain ïa ki shipai jong ka Ri na ka bynta ka jingiakhun kaba tyngeh hapoh ka ‘Operation Sindoor’ kaba buh thong ban khyrwit naphang ïa ki kam pyntriem ha shi lynter ka khappud da kaba phah artad ïa ka khubor kaba tyngeh pyrshah ïa kito kiba thmu ban pynsyier pyndik ïa ka suk ka sain ha ka ri.
Na ka liang ki nongïalam niam, da ka sur kaba ïatylli, ki la kular ban ai ka jingkyrshan ïa ka sorkar pdeng bad pynpaw ïa ka jingkyrmen ba ka shongsuk shongsain kan synshar ha ka thain baroh kawei. Baroh ki dkhot ryngkat bad ki heh sorkar bad kumjuh u Lat ki la pynlong ka jingai burom ïa u martir da kaba sngap jar kaba ar minit.