La ïoh sei ïa ka met u rangbah na Kenmynsaw bad handyman na Lumshnong
Pra phom ka ïng ha Kshaid ba twa khyndew
Shillong, Jylliew, 18 : Ka kynhun Search and Rescue Team jong ka tnat Fire and Emergency Services bad ki bor pulit ha ka sngi Saitjaiñ ki la ïoh sei ïa ka met jong u Bah Robino Kynter uba la jah rngai ha ka jingtwa ka khyndew ha ka shnong Kenmynsaw, Mawsynram C&RD Block.
Da ka jingtrei shitom jong ka kynhun SDRF ïa ka met jong une u rangbah la ïoh sei hi ha ka miet sngi Thohdieng ba la jia kane ka jingtwa khyndew.
Katkum ka kaiphod ba la phah da ka Deputy Commissioner jong ka East Khasi Hills District ka Kong Isawanda Laloo kaba dei ruh ka Chairperson jong ka District Disaster Management Authority (DDMA) ka la pyntip ba ha ka jingther jong u lapbah uba jur mynta ka sngi kawei ka ïing jong ka Kong Pyntngen Khongsit jong ka shnong Kshaid kaba hap hapoh ka Laitkroh Khatarshnong C&RD Block ka la julor na ka jingtwa ka khyndew.
Ha kane ka jingjia, kane ka ïing ka la mad ïa ka jingjulor hynrei donbok ba kam shym la don pat kano kano ka jingjia kaba sngewsih.
Shuh shuh ka Deputy Commissioner ka la pyntip ruh ba ka jingkieng ïaid kjat ha Sonatola kaba hap hapoh ka Mawsynram C&RD Block ka la julor na ka jingshah rah ha ka um.
Katba ka jingkieng ha Suktia kaba hap hapoh ka Shella-Bholaganj C&RD Block ka la shah pynjulor ha ka jingshlei jong ka um.
Ha ka jingther jong u lapbah, ka surok SVP ha Pyrkan, Shella kaba hap hapoh ka Shella-Bholaganj C&RD Block ka la julor hynrei hadien ba ladep maramot la shah ban ïaid ïa ki kali. Ka surok ha Nongjri-Bholaganj kaba hap hapoh ka Pynursla C&RD Block ka la julor bad haduh mynta ym pat lah satia ban shah ïaid ïa ki kali namar ka jingtwa jong ka khyndew hapdeng surok.
Kumjuh ruh ïa ka met jong u nongbud ka trok ( Handyman) AS 01 DD 4496 uba kyrteng u Bishujit Chakabarty 36 snem ka rta la lap da ka kynhun SDRF na ka jaka kaba jngai kumba 400 phut na ka jaka ba thung khlieh katei ka trok ha ka jingthwa surok ha Lumshnong. ïa ka met jongu la pynkhit sha Khliehriat Hospital ban pyndep ïaka post mortem. Une uba iap u dei na Teliamura, Santinagar, Khowai, West Tripura.