Yn hiar jurip u Myntri Rangbah ïa ka jingtwa ka surok NH-6 ha Lumshnong

Shillong, Jylliew 18 : U Myntri Rangbah ka jylla u Conrad K Sangma hynnin ka sngi u la leit sha nongbah Delhi na ka bynta ban pan jingïarap pisa na ka bynta ban ïoh maramot noh ïa ki jingjulor ba la shah lyngshop ha ki bor mariang naduh ki surok, ki jingkieng, ki ïing briew, ki skul, ki jaka rep jaka riang khamtam ka jingiap kaba haduh 27 ngut ki mynsiem briew. Ha kane ka jingleit u la ïoh ban ïa kynduh ïa ka Myntri Kam Pla Pisa ka sorkar pdeng ka Nirmala Sitharaman bad pyntip lut sha ka ïa ka jingshah ktah ka jylla na ka jingjur u lapbah bad kyntu ïa ka ba kan ïarap pisa kyrpang ïa ka jylla. Nalor kane ula pyntip ruh sha u Myntri Rangbah duh ka ri u Narendra Modi bad sha u Myntri Kam pohïing ka ri u Amit Shah bad kyrpad ïa ki ban phai khmat lem sha ka jylla Meghalaya kaba la ïa kynduh ïa kine ki jingjia ba sngewsih.
Na ka liang kitei ki heh jongka sorkar pdeng ki la pynpaw ba kin shim khia ban ïarap ïa ka jylla Meghalaya khnang ba kan ïoh ban maramot biang ïa kine ki jingshah pynjot, pynjulor bad ïarap ruh ïa ki longïing kiba la duh ïakiba ieit ba thoiñ jongki.
La shai pat ka sngi U Blei U Myntri Rangbah un leit ban jurip da lade ïa ka surok bah NH 6 kaba la shah pynjulor ha ka um na ka jingther u lapbah kat haduh ba kan da twa bad ym lait kali shuh ban ïaid. Kane ka jingkhyllem jongkane ka surok ha Lumshnong ka la jia ha ka 16 tarik mynta u bnai. Hadien kane ka jingjurip bad ïohi da la ki khmat un bthah pat ïa ki bor ba dei peit ba kin pynsted ïa ka jingtrei khnang ban lait noh ka leit ka wan na katei ka surok.
Naduh ba jia kane ka jingkhyllem bad twa kane ka surok, ka leit ka wan na East Jaintia sha ki bynta ka Lower Assam, Manipur, Mizoram bad Tripura ka la sangeh lut.
Ym tang ha katei ka jaka hynrei ka jingorpait jongkatei ka surok NH 6 ka la jia ruh ha Umkiang, Kuliang, Ratacherra bad kane ka la pynlong ïa ki nongleit nongwan ban ym nud ïaid shuh na katei ka surok namar ka buh ïa ka jingim jongki ha ka jingma kaba khraw.
Kumba long mynta ïa ki kali heh la pynsangeh ban ïaid na katei ka surok. ïa ki kali rit la phah ïaid na ka surok na Brichyrnot sha Lumshnong ba don ka Star Cement tangba kane ka surok ruh kam long kaba bha bad ki paidbah ki hap hi ban husiar bha haba ïaid na katei ka surok ruh. ïa ki kali kit marbam sha kiwei ki jylla kin hap ban sangeh ynda la poi ha katei ka jaka bad hap ban kit pat da ki kali rit.
Na ka liang u Myntri ka tnad kam pohïing uba dei u Chairman jongka Regional Committee u ma Lahkmen Rymbui u la dep wan jurip ïa katei ka surok ryngkat bad u MLA na katei ka thaiñ u ma Shitlang Pale ha ka Sngi Palei mynta ka taiew. Mynta ka sngi u ma Lahkmen u la leit jurip pat ïaka surok Chyrmang-Iongnoh kaba la dkut noh na ka jingjur slap.