Ban ïadonbynta lang bad ka jingjia ha Pahalgam, kumba 90% ki dukan ha ïewduh ki la khanglut

Shillong, Ïaïong 28: Ka ïewduh bad ka Khyndailad ha ka sngi Nyngkong ka la kynjah jar naba 90% eiei na ki dukan ha kine ki thaiñ ki la khang kum ka dak ban ïa donbyntalang bad kito ki 26 ngut ki mynsiem ba lui lui kiba la shah siat ïap ha ki lehnoh ha Pahalgam, Jamu & Kashmir.
Ha ka jingleit jurip jong u nongthoh khubor la lap ba ha ïewduh jan baroh ki dukan ki la khanglut hynrei ki basa kum ka Basa Doh, ka Basa die Dohkha, ka Basa tympew ba dielang bad ka Basa Kwai kiba dei lehse ki Basa ba die da ki Khasi ki khambun kiba plie bad kumjuh ruh ki bynta jong ka Motphran kiba bun ki briew kiba iaid bad ieng bad ba don ruh kiba die jingdie.
Lah ban ong ba kane ka jingkhot phah khang ïa ki dukan la kyntu da ka Barabazar Merchants and Shopkeepers Association bad ka Shillong Citizens Forum ha kaba kine ki la pynlong ruh ka jingthang mombati ha ka 27 tarik mynta u bnai naduh ka por 5 baje janmiet haduh ka 7 baje janmiet, nangta ki la phah ruh ïa ka dorkhas sha u Myntri Rangbah Duh ka ri bad sha u Myntri Rangbah ka Meghalaya ba kin shim kam da kaba tyngeh pyrshah ïa ki lehnoh kiba la siat ïap ïa ki nongwan jngohkai ha Pahalgam.
Lah ban ong ba ha ki thaiñ Khyndailad, Ïewduh, Garikhana, Jhalupara, Polo bad kiwei kiwei ki jaka ruh, ka jingïakhang ïa ki dukan ka la trei kam ryntih da ki paid nongkhaiï.
Lah ban kdew ba ïa kane ka jingkhang pakhang dukan, la pyrshah jur da ka seng HITO kaba la mudui sha ki bor pynïaid District bad kumjuh ruh ka Mahila Congress.
Ki Nongkhaiï ki la kheiñ ïa ka jinghiar thma ïa ki lui lui ha Pahalgam kum ka kam khawpud bad dawa ïa ka Sorkar ban leh da kaba tyngeh pyrshah ïa ki kynhun lehnoh bad kiba don bynta ha lyndet namar kane ka kam pyntriem ba shyrkhei.