Nongstoiñ, Ïaiong, 27: Ka kynhun ki nongtrei Muster Roll hapoh ka shatri jong ka All Meghalaya Muster Roll Progressive Workers Union, ka la pynlong ïa ka jingïalang paidbah ha ka sngi Saitjaiñ ha Bishop Hall Nongstoiñ, West Khasi Hills District.
Ha katei ka sngi baroh ki nongtrei muster roll kiba na ki District bapher bapher jong ka Jylla Meghalaya, kynthup naduh kiba na Rilum Garo, Khasi Hills bad Ri Bhoi, ki la wan ban ïashimbynta ha katei ka jingïakynduh lang ban ïa phylliew jingmut haba ïadei bad ki mat treikam jong ka kynhun.
Ha ka jingïalang paidbah, ka kynhun ka la shim ruh ïa ka rai ban pynthymmai ïa ki nongkitkam na ka bynta ka samoi treikam jong u snem 2025-2028, da kaba shu pynthymmai ïa ki juh hi ki nongkitkam barim bad tang katto katne ngut la ïoh ki dkhot ba thymmai.
Ki nongkitkam kiba thymmai kiba la shah jied pynthymmai biang ki kynthup ïa u bah Hubert Kharbani kum u Lamphang (President), bah Nazarius K Lanong kum u Pyndap Phang (Secretary), u bah John Kennedy Lyngkhoi kum u Publicity Secretary, u Dibinan Marak kum u Vice President, Aiden John Laithma Assistant Secretary, ka kong Euginia Wahlang kum ka Treasurer, Menjuss Momin kum u joint Secretary bad kiwei kiwei.
