Ka Sorkar Jylla ka la pyrkhing bha ïa ka jingrung be-aiñ ki mynder Bangladeshi: Dy. CM

Shillong, Ïaïong 16: U Symbud Myntri Rangbah ka jylla u ba khmih ïa ka tnat Kam Pohïing u Bah Prestone Tynsong u la ong ba ka sorkar kan bteng ban shim ïa ki sienjam kiba pyrkhing bad ba kongsan ban ïada na ka jingwan rung beaiñ na khappud da ki nong Bangladeshi sha Meghalaya.
Haba kren sha ki lad pathai khubor ha ka sngi Balang u Bah Tynsong u la ïathuh ba u la lum ka jingïalang bishar kam bad ki heh pulit halor kane ka kam.
“Ngi la ïasyllok bniah halor kane ka jingwan rung beaiñ ki nong Bangladeshi, kaba dei ka kam kaba sngewkhia bha na ka bynta ka tnat pulit. Kadei ka jingkitkhlieh jong ngi ban pynthikna ba kum kine kim dei ban jia,” bynrap u Bah Prestone Tynsong ha kaba u la ïaroh ïa ka jingpyrshang ban ïoh kem ïa ki nongwan beaiñ na Bangladeshi kaba la shim khia da ki pulit ka Meghalaya Police, bad ki Border Security Force (BSF), kumjuh ruh ki nongtrei ka Custom. “Ki pulit jong ngi da ka jingïasngewthuh bad ïatreilang bad ki BSF bad ka Custom, ki la lah ban pynsangeh ïa kane ka jingwan rung beaiñ ki nong Bangladeshi shapoh u pud u sam ka ri India,” u la ong.
U la banjur ruh halor ka jingdonkam ban pynkhlaiñ ka jingïatreilang bad ki inter-agency. “Nga la kyntu ïa u DIG ban pynthikna ban don ka jingïatreilang kaba ïajan bad ki shipai ka sorkar pdeng bad ka Custom ha ki thaiñ khappud,” u la bynrap.
Katkum ka jingïathuh u Symbud Myntri Rangbah ka la jingpeitngor ka la kiew bha bad ka jingïatreilang ha khappud ka long kaba kongsan bha ban ïada na ka jingwan rungtuh, kaba long ym tang ïa ka lad jingïada hynrei ïa ka ïoh ka kot jong ka thaiñ.
“Ngin ïaibteng ban shim baroh ki sienjam ba kongsan ban ïada na kane ka jingwan rung beaiñ bad ban ïada ruh ki pud ki sam ka jylla,” u la pynthikna.