Nongstoiñ, Ïaiong 16: Ka Meghalaya Schools Welfare Development Association (MSWDA) ha ka sngi Balang ka la lum ïa ki nongmihkhmat jong ki School Managing Committee ba kynthup lang ïa ki Headmaster, Headmistress na ki Skul Secondary bad Higher Secondary, SSA bad Adhoc School kiba pynïaid da ki Mission, NGO, skul shimet bad kiwei kiwei ban ïakren bad ban ïathir ïatai sani halor ka jingpan ka tnat Pule Puthi ka Sorkar Jylla ban shimti ïa ki skul SSA.
Ha ka jingïalang kaba la long ha Ri Khasi Free Morning School, New Nongstoiñ West Khasi Hills District, la ïaphylliew jingmut bha halor ki mat ba kongsan kiba ka kynhun ka ladep buh da ka jingthoh sha u Myntri ka tnad Pule Puthi naduh ka 4 tarik mynta u bnai ïa kaba la ïoh ban ïakren ruh ha ka 10 tarik mynta u bnai.
Ki mat ba kongsan ki kynthup naduh ka jingpynbeit ïa ki rukom pynïaid skul, ka jingïarap pisa na ka bynta ki Secondary bad ka jingkyntiew kyrdan. Ban pynkhlaiñ ïa ki Primary School, ban ïarap kyrpang ruh ïa ki nonghikai katkum ki kyrdan ba ki don bad ki lad jingïarap ïa ki skul kum ki uniphom, ki lad jingïarap ban pynbha ïa ki skul bad kiwei.
La ïakren ruh ïa ka jingdonkam kum ka jingkyrpad ban ithuh noh ïa ki skul baroh bad yn kyrpad ruh ïa ka tnad ka Pule Puthi ban shong biang kham kloi ïa ka Recognition Committee kaba dang shu dep long shen ha u bnai Rymphang 2025.
La ïakren halor ki skul ki bym treh ne mynjur ban aiti ïa ka Management sha ka tnat Pule Puthi jong ka Sorkar Jylla bad ka Association ka la shim ruh ïa ka rai ban ïakren bad u Myntri Rangbah ka jylla Meghalaya Conrad K.Sangma haba ïadei bad kane ka mat.
Ha ka jingïalang la donlang u President Bah H.M.Marbaniang, Bah NL Marshiangbai, Bah Hope S.Myrthong uba mihkhmat na ka West Khasi Hills District, Bah Reston Myrthong ba mihkhmat na ka South West Khasi Hillls District bad kynthup ruh na Eastern West Khasi Hillls District bad kiwei kiwei.
