Shillong, Ïaïong 16: U General Secretary ka state BJP u Bah Wankitbok Pohshna ha ka sngi Balang u la kyntu ïa u MP ka Congress na Tura u Saleng A Sangma ban kren shaphang ka National Herald case.
“Kane ka kotkhubor kaba la khang na ka daw ba ka la shim ïa ka ram kaba ym donkam ban siew sut kaba T. 90.25 klur na ka Indian National Congress ha kaba lada peit ïa ka The People’s Representation Act, kam shah ïa ki seng saiñ pyrthei ba rung hapoh ki kam khaïi bad kino kino ki riew shimet ha kaba ka Congress ka la leh ïa kane. Namar kata nga kwah ban buh ka jingkylli kawei kaba u Saleng u don ban ong halor kane kam?” ïathuh u Pohshna sha ki lad pathai khubor.
U la ong ba ka Congress party kaba kam ïalade ba ka dei ka party kaba bud ïa ki principle ki Gandhi kaba dei ka jingshisha hynrei mynta la ïohi ba kane ka la long pynban hapdeng kaba sniew bad ka duriaw rong blue kaba jylliew’.
“Kim lah shuh ban pynbeij ïa ki nongshong shnong ka India da kaba ïaid lait ïa kane ka jingthmu lyngba ki jingïakhih bad ki jingpynrem kiba bun jait naba ki nongïalam ba halor jong ka ki la shah chargesheet hapoh ka Prevention of Money Laundering Act (PMLA). Kane ka kam National Herald case kadei ka jingïaleh bad ka aiñ kaba dang ïaid bad ki nongïalam jong ka kum ka Sonia Gandhi bad ki nongïalam ka liang pyrshah ba mynta kum u Rahul Gandhi ki la paw kum kiba la shah suba kiba halor tam napdeng kiwei pat,” ïathuh u Pohshna da kaba bynrap, “Ki la don ki jingpynïaid bad ai ïa ka pisa kaba don ruh da ki jingthoh sakhi. Ngi nongshong shnong ka Meghalaya ngi kwah ban buh ka jingkylli ïa ka Congress party ba kam dei ka jingshisha ba ka Congress bad ki kam bamsap jong ka kin long kajuh.”
U la ong ba ki jingshisha ki la paw shaphang ki kam jingdon jingem ba la long trai da ka AJL mynta ka la kylla sha ka karkhana shimet ba la longtrai da ka ïing ka sem jong uwei.
“Lada phi peit ïa ka khana jong ka AJL hadien ba la seng ïa ka kot khubor National Herald kaba dei ha ka snem 1937, ka jingthmu ka kot khubor ka long ban pynrung ha ka jingmut jingpyrkhat jong kiba ïaleh laitluid kaba la jia ha kito ki snem bad kumba 5000 ngut kiba ïaleh laitluid ki dei ki nongshong shnong bad ki riewshem phang ha ka AJL. Kumno mynta ka la kylla long ka jingbam sap kaba la jia ïa ki riew shemphang bad nga thikna ba lada phi pule ïa jingthoh ka don ka jingleh thok bad kumno ba ki nongshong shnong ki la shah pynbeij.”
Shuh shuh u nongïalam ka BJP u la ong ba ka Congress ka dei ban ïathuh ïa ki paidbah kaei kane ka kam kadei ha ka jaka ban pynlong ki jingïakhih ba bun ne ki jingpynrem halor ki kam kiba rit.
“Ki la pyrshang ban pynkynriah ïa ka jingmut jingpyrkhat jong ki nongshong shnong hynrei kane ka dei kaba ngi hap ban pynleit jingmut. Kane kadei kaei kaba ngi kwah ban ïathuh ïa ki paidbah ka Meghalaya bad ka Congress kadei ban jubab halor kine ki jingkylli ba la buh da ka BJP sha ki. Mynta ngi kyntu ïa ki nongïalam ka Congress ban sangeh kine ki kam ba tad bad kadei ban shah ïa ka aiñ ban shim ïa kane ka case kumba ka dei ban long. Kane ka kam dei ban ailad ba kan pynkut khnang ba ka jingbishar hok ïa ki nongshong shnong ba nynkong la pynïoh bad ba kim dei ban shah kyntait,” u la bynrap.
