ïaroh ka MoS ha ïadei bad ka bha ka miat jong ki khynnah bad pynkupbor ïa ki longkmie ha Meghalaya

Shillong, Ïaïong 16: Ka Myntri khynnah ba dei khmih ïa ka Tnad Women and Child Development, Sorkar India, ka Savitri Thakur, ha ka sngi kaba ar jong ka jingwanjngoh jong ka ïa ka jylla Meghalaya ka la pynlong ka jingleit jngoh ïa East Khasi Hills District ha ka 16 tarik Ïaïong 2025, ban peit bniah ka jingpyntreikam ïa ki skhim ba kongsan bad ban ïakren bad ki nongshim bynta ha ka kam.
Kum shibynta ka jingleit jngoh, ka Myntri ka la leit ban jurip ïa ka One-Stop Centre, Shakti Sadan, kaba don ha Mawroh. Khatphra ngut ki briew, kiba don hapdeng ka rta 18 haduh 50 snem, ki sah mynta ha katei ka jaka bad ki ïashim bynta ha ki prokram ai jinghikai ha ki kam bapher bapher. Ka Myntri ka la ïakren bad ki bad pynshlur ïa ki jingpyrshang jong ki na ka bynta ka jingpyn kupbor bad ka jingpynbha.
Ka Myntri ka la leit jngoh ruh ïa ka jaka sumar ïa ki khynnah ha Mawkasiang, ha kaba ka la ïakynduh bad ki nongtrei, ki khynnah, bad ki nongsumar. Ka la ïaroh ïa ka jingtrei jong kane ka jaka treikam ha kaba pynthikna ka jingïada bad jingsumar ïa ki khynnah bad ka la ban jur ïa ka jingdonkam ban bteng ïa ka jingkyrshan ha ka liang ka bor pyrkhat bad ka jingpule kaba bha na ka bynta ki khynnah kiba donkam ïa ka jingsumar bad jingïada.
Ha ka Anganwadi Centre ha Mawsmai, ka Myntri ka la peit bniah ïa ki jingshakri ba la ai hapoh ka skhim Integrated Child Development Services (ICDS), kynthup ïa ka jingbam ba tei met, ka jinghikai ïa ki khynnah rit, bad ka jingpeit bniah ïa ka koit ka khiah. Ka la ïaroh ïa ka jingaiti jong ki Nongtrei Anganwadi bad ki Nongïarap bad ka la pynshlur ïa ka jingïashim bynta jong ki nongshong shnong ha ki prokram ba ïadei bad ka bha ka miat jong ki khynnah.
Ha ka jingleit jngoh jong ka ïa ka Community Health Centre (CHC) ha Sohra, ka Myntri ka la bishar bniah ïa ki jingshakri ha ka koit ka khiah jong ki longkmie bad ki khunlung, ka jingdon ki dawai ba kongsan, bad ka jingpynïasohlang ïa ki skhim ka koit ka khiah bad ka jingbam ba tei met. Ka la pynskhem biang ïa ka jingkut jingmut jong ka Sorkar ban kyntiew ïa ka jingïoh jingsumar na ka bynta ki longkmie bad ki khynnah, khamtam ha ki jaka ba jngai bad ki jaka riewlum.
Ha kane ka jingleit jurip la kynthup ruh ïa ka jingjurip ïa ki projek pynroi ha ki jaka nongkyndong kiba hap hapoh ka MGNREGS bad PMAY-G. Ka Myntri ka la ïakren bad ki nongïoh jingmyntoi bad bishar bniah ïa ka jingïaid shaphrang bad ka jingktah jong kine ki sienjam. Ka la ai khublei ïa ka jingïatreilang hapdeng ki tnad kaba ïarap ban kyntiew ïa ka kamai kajih ha ki jaka nongkyndong bad ki jingdon jingem.
Ka Myntri ka la pynkut ïa ka jingleit jong ka da kaba ai khublei ïa ki bor pynïaid District bad ki nongshim bynta ha ka thaiñ namar ka jingtrei shitom jong ki ban pynkhlaiñ ïa ka jingai jingsumar ha ki jaka sumar, ka jingbam kaba tei, bad ka jingpynkupbor ïa ki longkmie bad ki khynnah ha jylla Meghalaya.