Shillong, Ïaïong 14: Ka Liang Pyrshah Voice of the People Party (VPP) ha ka kyrwoh khubor ka la pynbna ïa ka rai ban ym leit ïashimbynta ha ka jingïalang ban wan jong ka All Party Committee ba la thaw da ka Sorkar ban shong bishar ïa ki kam ba ïadei bad ka jingpynïasoh lynti rel ha Ri-lum Khasi bad Jaiñtia.
Ha ka shithi ba la phah sha u Chief Secretary u Bah DP Wahlang, u General Secretary ka VPP bad MP ka Shillong Dr Ricky AJ Syngkon ula ong, “Ka VPP ka sngewsih ban pyntip ba ngin ym ïashimbynta ha kane ka Committee ïa mynta”.
Haba ïaroh ïa ki sienjam ba shim da ka Sorkar ban thaw ïa ka All Party Committee, u Dr Syngkon ula ong, “Hynrei, ka VPP ka don jingsngew ba ha shuwa kano kano ka jingïakren ban wanrah lynti rel ha Ri-lum Khasi bad Jaiñtia, kan bha shibun ban leh eiei nyngkong eh ïa ki jingsngewkhia ba shonghok jong ki paidbah ba ïadei bad ka jingbym tehlakam ïa ka jingrung kyrthep ki briew ba nabar sha Jylla”.
Ula ong ba ka VPP ka sngew ba ka jingthaw ïa ka Committee ban ïakren bad pyntreikam ïa ki lad ki lynti kiba treikam bha ban khanglad ïa ka jingrung kyrthep ki briew ba nabar-kum ka Inner Line Permit (ILP)- ka dei ban wan hakhmat ban ba ïakren halor ka jingpynïasoh lynti rel.
