Jur ka aksiden ha Ri-Bhoi, duh bun ki mynsiem, hap phikir ki paidbah ba leit ba wan

Nongpoh, Ïaiong 14: Ka jingaksiden ha kine ki khyndiat sngi bad ki khyndiat bnai bala dep ka jur bha ha kylleng ki bynta jong ka Ri-Bhoi District, kaba la wanrah ruh shibun ki jingmynsaw jong ki paidbah khamtam ka jingjia ba sngewsih naka jingduh noh ki mynsiem briew.
Lah ruh ban kdew hangne ba naka liang ka tnad pulit jong ka Ri-Bhoi naka por shaka por ki ju hikai sha ki paidbah ban phikir bad ban burom ïaki aiñ ñiah kali ha surok bah naduh ki kali ar shaka, ki kali rit haduh ki kali heh, hynrei kiba bun naki paidbah kim burom satia bad pynkheiñ aiñ da kaba pynher sted, dih kyiad haba ñiah kali, kit palat pud, ïeng kulmar haki jaka bym dei bad kumta ter ter kaba long pynban kum ka jingpynap shrip.
Dang ha kine ki khyndiat bnai bala leit shibun ki mynsiem briew kila duh noh ïala ka jingim haki jingjia aksiden bapher bapher ha kylleng ki jaka ka Ri-Bhoi District, bad katno ka long ka jingkthang ka mynsiem ïa ki bahaiing hasem ban duh noh ïala ki baieid ba thoiñ haka por bym dei, namar ha kiba bun hi ki jingjia aksiden ki jia tang nakadaw ka jingkhlem akor bad ka jingbym burom ïaki aiñ ñiah kali khamtam haka por mynmiet ba kum ki paidbah ki dei ban phikir haka leit ka wan, namar teng teng watla ki ñiah bha ïaki kali ki don pat kiwei kiba wan tynrah bad ñiah khlem akor kiba ngim lah ban lait ha surok bah.
Nalor kitei ki jingjia aksiden kiba ju jia haki sngi pohia bad kiwei kiwei ki sngi, kiba bun naki paidbah kila pynpaw ruh ka jingsngewkhia bad sngew bitar ban iohi ba ka kynhun jong ki phew bad ki spah ngut ki samla ki ju pynlong kum ka jaka stunt ïaki thuk thuk ar shaka ha surok bah NH 6 man la ka sngi u Blei, khamtam naduh ka thaiñ Umsning haduh Nongpoh bad kane ka pynsyier bad pynher mynsiem ïaki paidbah ha shilynter u surok kiba ju leit ju wan, namar ka surok bah kam dei ka jaka lehkai bad ngim lah ban tip kano ka por ba ngi bakla kaba lah pynban ban lam sha ka jingjia ba sngewsih khamtam kiwei ki paidbah kiba ïaid da ka lynti.
Namarkata, ka tnad pulit ka dei ruh ban shimkhia ban nym ailad ïakitei ki samla ban lehkai ha surok bah haka sngi u Blei, kaba dei ka surok bah ba bun ki kali ba ïaid ba ïeng, ban nym pynher mynsiem ïaki paidbah nalor ka jingsawa kaba pynthud ïaki jaka long jingïaseng.
Kum ban shu kdew hangne, ka tnad pulit jong ka Ri-Bhoi khamtam ki pulit pynïaid surok jong ka Nongpoh hapoh ka jingïalam jong u Rubul Ali kum u Officer in Charge kila trei shitom katlah kat ïai ban pynsngewthuh sha ki paidbah kiba ñiah kali naduh ki ar shaka ban burom ïaki aiñ ñiah kali, ban deng helmet, seat belt, bad khamtam ban nym dih kyiad haka por ba ñiah kali bad kum ka tnad pulit jong ka Nongpoh Traffic ki ju pynlong ïaka jingtalasi ba man ka por, ban lait naki jingjia aksiden.