Ka jingpass matrik ba 87.10% ka paw ba ka Meghalaya ka la kiew ha ka jingpule : PT Sawkmie

Shillong, Iaiong 11 : U Bah P.T Sawkmie, MLA barim hynne ka sngi u la pynpaw ba ka jingpass bha ki samla ha ka Secondary School Leaving Certificate (SSLC) ne ka matrik mynta u snem ka paw ba ka jylla Meghalaya ka la kiew ha ka jingpule bad kan sa ïa hap kyrdan ha ki jingpule bad kiwei ki jylla hapoh India.
“Ka jingpass bha ki samla ha ka SSLC ne Matrik mynta u snem ka paw ba ka jylla Meghalaya jong ngi ka la kiew bad kan sa ïahap kyrdan ha ka jingpule bad kiwei ki jylla hapoh ka ri India,”ong u bah PT Sawkmie haba kren sha u nongthoh khubor.
U la bynrap, “Kane baroh ka dei ka jingtrei shitom ki nonghikai, ki khynnah skul, ka jingshimkhia ki kmie ki kpa bad khamtam ka vision ne jingïohi jngai jong u Chief Minister Conrad Sangma uba la pyllait paidbah ïa ka Chief Minister Guide Book, kaba la long ka jingmyntoi ka bakhraw ïa ki samla pule.”
U ong ruh ba ki paidbah ka jylla ki kwah ban ïohi ba nangne sha khmat ba ka Literacy rate ha ka jylla kan long shispah percent.