Nongstoiñ, Ïaiong 9 : Ka Khasi Students Union West Khasi Hills District, hynne ka sngi balang ka la leit ïakynduh ïa u Deputy Commissioner ka District ban ud halor ka jingshem jingeh jong kiba bun ki samla pule ba dang shu pass SSLC ba kin ïoh jaka pule ha ka District.
Kane ka Seng ki samla pule ka la kyntu ïa une u khlieh duh ka District ba un thaw lem ïa ki lad ki lynti ban lah ïarap ïa ki samla pule klas XI bad XII, ba kin ym duh ban bteng ïa ka jingpule da ka jingbym ïoh rung klas ha ki jaka pule bapher bapher.
Ha kajuh ka por, ka la kyntu ruh ïa ka tnad Pule Puthi lyngba u DC ba kan pynbun shuh shuh ïa ki seat pule Science ha Sibsingh Govt Higher Secondary School, Nongpyndeng, kaba don tang 20 seat.
Ka seng ka la ai jingmut ruh ban kham pynbun shuh shuh ïa ki seat ha kiwei pat ki stream, da kaba pynkha ïa ki kamra klas bad thung shuh shuh ïa ki nonghikai, khnang ban weng noh ïa ka jingeh jong ki samla pule, khamtam kito kiba wan na ki longïing kiba duna ka jingïoh.
