Peit bha ïa ki nala um ban ym shlei jaboh haba jur u lapbah, bthah ka Myntri ha ka jingjurip ha Lachumiere

Shillong, Ïaiong 09 : Ka MLA jong ka Shillong East kaba dei ruh ka Myntri Sorkar ka Jylla, Dr. M Ampareen Lyngdoh ha ka sngi Balang ka la leit ban jurip ïa ka shnong Lachumiere bad kyntu ïa ki ophisar ka tnad Urban Affairs ba kin peit ïa ki jingeh haba ïadei bad ka nala um kaba la wanrah ïa ka jingshlei um ha ka thain.
Ha kane ka jingleit jurip la synran lang da ki nongïalam shnong jong ka Dorbar Shnong Lachumiere ryngkat ki ophisar sorkar.
Na ka liang ka Myntri haba kren bad ki lad pathai khubor ka la ong, “Nga la ïalam lang ïa ki ophisar ba dei peit namar ka tnad ka don bynta lang ha ka jingjurip, ngi donkam ban leh kyrkieh ïa kane bad ïa kane ka kam mynta la bishar bniah bad ngan sa buddien biang ïa ka hadien 20 sngi hadien kata ka jingjurip.”
Ka la ïathuh ruh ba hadien ba la pyndep ïa ka surok All Saints kaba don hadien kane ka skul bad kumjuh ka jingpynbiang ïa ka nala ïaid um kadei ka bynta kaba hakhmat eh lada wan u lapbah.
“Mynta ka sngi ngi la ïoh ïa u slap ba nyngkong eh bad uba jur bha kaba la wanrah ruh ïa ka jingshlei um bad kane ka jingshlei um kadei ka mat kaba khia bha na ka bynta ki jaka sor khamtam kumno ban leh lada jia ba wan kynsan u lapbah bad ba ki nala ïaid um kim biang,” ka la ong.
Ka ong ruh ba ki nala hadien ka Sylvan House kiba ïaid ter ter shaduh Secretariat Hill bad Wah Pomdngiem ki donkam ban pynheh shuh shuh.
Ka ong ba halor kane ka bynta donkam ïa ka tnad Urban Affairs ban shimkhia namar kane ka jingshlei um ka lah ban wanrah ka jingma kaba khraw ïa ki paidbah kiba sah ha shi lynter jong ka Sylvan House kynthup ïa ka bynta pdeng jong ka Lachumiere.
Ha kajuh ka por ka Myntri ka la buddien ïa ka jingpynïaid kali sawdong jong ka Lachumiere.