Leit khang ka HYC ïaka Bank Nongkyndong ha Patharkhmah, bym burom ïaka shuti Shad Suk Mynsiem

Nongpoh, Ïaïong 07: Ka HYC Ri Bhoi Sepngi mynta ka sngi kala leit ban phah khang ïa kawei naki bank kaba don haki thaiñ Patharkhmah, ka Meghalaya Rural Bank ba kam shym la burom ne kheiñ snep ïaka sngi Shad Suk Mynsiem kaba dei ruh ka sngi shuti kumba la pynbna daka sorkar jylla hynrei katei ka bank ka la pynlong trei kumba ju long ha kiwei ki sngi.
Haba ïoh jingtip halor katei ka jingleh bym suitñiew daka katei ka bank, ka seng Hynñiewtrep Youth Council Ri Bhoi Sepngi hapoh ka jingïalam u Samla RC Thankhiew kum u president lem bad ki dkhot ki la leit ban khang khyrdep syndon ïa katei ka bank.
Haba kren sha ki lad pathai khubor, u Samla RC Thankhiew kum u President, u la pynpaw ïaka jingsngewkhia ban iohi ba kane ka bank kam shym la burom ne suidñiew ïa kane ka sngi kyrpang jong ki khun Khasi kaba dei ruh ka sngi shuti ha baroh kawei ka jylla.
U la ong ruh, hadien ba la leit ban ïa kren bad ki heh jong ka bank naka liang jong ka Seng ka la dawa beit ba ka dei ban khang mardor bad ban burom ïa kane ka sngi bad u la pynpaw ba ha katei ka jingïakren naka liang jong ki heh jong ka bank ki la kloi ban sngap ïa ka jingdawa jong ka seng bad ki la pynpaw ba ka bank ka la kloi ban pynsangeh ïa ka jingtrei.