Paw ka khynnah St. Joseph HSS Umden ha kyrdan ba 12 ha ka result SSCL 2025

Nongpoh, Ïaiong 07: Ka long ka jingkmen bad ka jingsarong ïaka thaiñ Umden baroh kawei hadien ba kawei ka khynnah skul jong ka St. Joseph Higher Secondary School Umden, Nongtluh kala ioh ban rung haka kyrdan ba 12 jong ka thup Top 20 ka result SSLC bala dang shu pynbna da ka MBOSE haka sngi Saitjaiñ.
Katei ka khynnah kaba la wanrah ïaka nam bad burom ïaka skul St. Joseph Higher Secondary School, Umden Nongtluh ka dei ka samla Lawanbiang Sarika Mallai kaba la ioh ban khur haduh 563 marks bad rung ruh haka kyrdan ba 12 jong ka thup Top 20 bad kane ka dei ruh ka sien ba ar ba katei ka skul naka thaiñ ba kham kyndong kala pynmih ïa ki khynnah ba rung haka thup Top 20 bad ka sien ba nyngkong ka dei ha u snem 2014 lyngba u samla Marcel Lyngdoh u ba la rung haka kyrdan ba 18 jong ka Top 20.
Kum ban shu kdew hangne, ba haki lad pathai khubor bala mih hynnin ka sngi kila paw ba ki don 4 ngut ki khynnah kila rung haka thup top 20 na Ri-Bhoi District, namar ka jingbakla jong ka MBOSE ban pynmih ïaka kyrteng jong ka jaka ba don katei ka skul ha kaba katkum ka thup kyrteng (First Twenty Candidates in Order of Merit) la thoh ïaka kyrteng skul ba pule katei ka khynnah da ka St. Joseph Higher Secondary School, Umden Nongthliew haka jaka jong Umden Nongtluh.
Bad kumba long haduh mynta, ki khynnah kiba rung haka thup Top 20 na Ri-Bhoi District ki don haduh 5 ngut ba kynthup ïa u Sourav Pandey na Alpha English Higher Secondary School, Nongpoh, uba la ioh rung ha ka kyrdan ba 3 hadien ba u la ioh ban khur haduh 576 marks, nangta ka samla Nandini Kumari na Alpha English Higher Secondary School, Nongpoh ka la rung haka kyrdan ba 6 hadien ba kala ioh haduh 569 marks.
Ka Queency Kharsohnoh na ka Umroi Presbyterian Higher Secondary School, Umroi, ka la ioh rung ha kyrdan ba 7 kala ioh khur haduh 568 marks, ka samla Lawanbiang Sarika Mallai na St. Joseph Higher Secondary School Umden Nongtluh kala rung haka kyrdan ba 12 bad khur haduh 563 marks lem bad ka Samla Ineshabakor Nongrum na Nehru Memorial Secondary School, Umsning, ka la ioh rung ha ka kyrdan ba 14 da kaba ioh khur 561 marks.
Haba ioh ban ïakren bad ka samla Lawanbiang Sarika Mallai kala ong ba ka jingtrei shitom bad ka jingminot hi ka dei kaba la pynlong ïaka ban poi sha katei ka thong bad ka ju pynlut por palat ïaka 5 kynta man ka sngi ban minot haki kot pule, ki notes bala pynbiang da ki nonghikai ryngkat ka jingkyntu ruh ïa kiwei ki samla khamtam naka thaiñ nongkyndong ba kin minot thop haki jingpule bad ban bud ïaka thong jong ki, bad lyngba katei ka jingpass bha naka liang katei ka samla mynta kala pynpaw ba ka angnud ban leit pule Science bad ban dang lehbha shuh shuh haki jingpule ba kham shalor.
Naka liang u Fr. Joakim Principal ka St. Joseph Higher Secondary School Umden u la ong ba na ka liang ka skul managing committee bad ki nonghikai nga ai ka jingkhublei kaba khraw ïa ka samla Lawanbiang Sarika Mallai kaba la ioh ia ka kyrdan kaba 12 ha ka kyrdan jong ka result SSLC haka jylla baroh kawei bad kane ka long shisha ka jingsarong ïaka bad ka skul kumjuh.
“Kum ka skul baroh kawei ngi da sngewnguh ïaka jingkut jingmut jong ka ban leh bha haka jingpule ryngkat ka jingkitbok haki jingpule ba kham shalor bad kane ka long shisha ka nuksa ba bha naka bynta kiba bun ki khynnah ba wan naki thaiñ nongkyndong” la ong u Fr Joakim da kaba bynrap ruh ba kum ka skul baroh kawei ka ai ruh ka jingkhublei ïa baroh ki samla pule ka St. Joseph kiba la pass bha watla kim shym la lah ban rung haka thup Top 20.