Nongpoh, Jylliew 16: Ka Bharti Foundation kaba dei ka kynhun jong ka Bharti Enterprise kaba ju trei ban kyntiew ïaki skul bad ka pule ka puthi mynta ka sngi kala sdang ban plie paidbah ïaka Satya Bharti Quality Support Programme naka bynta ban kyrshan ban pynbit pynbiang ïaki 30 tylli ki skul ba ïarap da ka sorkar ha Ri-Bhoi District naka bynta 3 snem haduh 5 snem kynthih.
Katei ka Satya Bharti Quality Support Programme ka dei ruh kaba la sdang naduh u snem 2006 da ka jingthmu ban pynbit pynbiang bad ban kyntiew ïaka pule ka puthi haki skul ba ïarap da ka sorkar ryngkat ka jingïatreilang bad ka sorkar bad kham peit kyrpang ïaki khynnah kynthei, khnang ba ki skul kin kiew shaphrang ban ïaryngkat ruh bad kane ka juk ba mynta, ba ki khynnah kin long kylluid mynsiem bad ban iar ka jingmut jingpyrkhat.
Ha katei ka sngi ka kong Mary Lynrah kaba dei ka State Pedagogy Co-ordinator, SSA SEMAM kala shim bynta kum ka kongsan haka jingdonlang u Dr. Vincent Nianglang District Mission Co-ordinator, Ri-Bhoi District kum u symbud kongsan, ka kong Paidolyne L Nonglait District School Education Officer ka Ri-Bhoi, u Lt. Col. V P Singh, Regional Head of Bharti Foundation, ka Mamta Saikia, Chief Executive Officer, Bharti Foundation, bad kiwei kiwei ki ophisar naki tnad pule puthi ka jylla.
Haba kren ha katei ka sngi naka liang ka kong Mary Lynrah kum ka kongsan kala pynpaw ka jingsngewkmen ba katei ka kynhun jong ka Bharti Foundation ka don kajingïatreilang bad ka jingïadei kaba jan bad ka sorkar da ka jingnangnud ban pynbha bad ban pynbit pynbiang ban kyntiew ïaka pule ka puthi khamtam ha Ri-Bhoi District ha kaba 30 tylli ki skul kila shah jied ban shah kynthup ha katei ka prokram.
Kala ong ruh ba ka jingïadei jong ka Bharti Foundation bad ka sorkar kala long ka jingmyntoi kaba khraw ïaki skul bad khamtam ïaki khynnah ba duk ba rangli ba katei ka kynhun ka ju ïarap, bad kane kan wanrah ka jingkylla haka imlang ka sahlang khamtam ban kyntiew ruh ïaka Performance Grading Index (PGI) rating haka district bad ka jylla baroh kawei.
U Dr Vincent Nianglang DMC, RI-Bhoi District haba kren ha katei ka sngi u la ai ka jingïaroh ïa katei ka kynhun jong ka Bharti Foundation kaba la shim ïaka sienjam bad ka jingangnud ban dang kyntiew ïaka pule ka puthi ha Ri-Bhoi, namar ka pule puthi kaba paka ka long kaba kongsan ha kane ka juk kaba mynta kaba baroh baroh ki ïa beh ban ioh ïaka jingnang jingstad.
Naka liang ki nongïalam jong katei ka Foundation kila pynpaw ïa kiba bun ki jingeh ba ki skul ki mad ha Ri-Bhoi hadien ba ka kynhun jong ki kala pynlong ïaka jingwad bñiah naduh u bnai Ïaiong haduh u bnai Jylliew mynta u snem, bad lyngba ka jingïatrei lang bad ka sorkar, ki ophisar bad ki riew ïeid ïaka pule ka puthi yn dang lah ban pynbit pynbiang ïaki rukom treikam jong ki skul, ki rukom ai jinghikai ïaki khynnah bad khmih lynti ba katei ka prokram kan long kaba seisoh ban ioh ïaka pule ka puthi kaba paka, kila bynrap.
