Plie u MP ïa ka ophis treikam kaba itynnad ba tei ka DS Nongkseh lyngba ka skim MP bad CM

Shillong, Lber 31 : U MP ka Rajya Sabha na ka jylla Dr. WR Kharlukhi ha ka sngi Nyngkong u la plie paidbah ïa ka ophis treikam jong ka Dorbar Shnong Nongkseh Upper Shillong ïa kaba la tei bad shna itynnad bha lyngba ka skim MP bad na ka skim jong u Myntri Rangbah ka Jylla kaba long mar 15 lak tyngka.
Ïa kane ka ophis treikam kaba don ryngkat bad ka hall la plie ha ryngkat ka jingdonlang u OSD jong u Myntri Rangbah Bah Daniel Thangkhiew ba dei ruh u dkhot ka Executive Committee, nangta u BDO ka Mylliem Bah Toshan Marwein, Doctor i/c Shastri Memorial Dispensary Dr. R Lyngdoh bad ruh ka Executive Committee jong ka Dorbar Shnong Nongkseh.
La donlang ruh ha kane ka sngi naduh u Rangbah Shnong bad Secretary Shnong ka Lummawbah, ki seng longkmie seng samla bad kiwei kiwei.
Haba kren ha kane ka jingïalang u MP ka Jylla u la ong ba ka kam Rangbah Shnong ka long thik kum ka kam mishon ne ka kam trei mon sngewbha khlem jingsiew katba ka kam pat ka long kaba khia ban peit bad pynïaid ïa kiba bun ki kam kiba ïadei bad ka shnong ka thaw.
“Lada lah, ka sorkar ka dei ban buh thong noh ban pynïoh ïa ki ophis treikam jong ki Dorbar Shnong ne kum kita ki secretariat ba rit ha ki shnong,” u la ong da kaba bynrap ba kadei ka kamram jong ki nongmihkhmat na ka bynta ban wanrah ïa ki kam pynroi ha ki shnong ki thaw.
Haba ïadei pat bad ka dorkhas ba ka shnong ka ai ha kane ka sngi, u MP u la ong ba um lah shuh ban kular namar ïa ka skim kaba 5 klur ba u ïoh u hap ban sam sha baroh kawei ka jylla. Tangba u ong pat ba lada ka jingkular jong u Myntri DONER ka urlong ban ai biang sa mar 5 klur ïa ki MP ka thain shatei lam-mihngi jong ka Ri lehse un pyrshang na katei ka bhah ba thymmai.
“Ha Rajya Sabha ngi hap ban ai ïa baroh kawei ka jylla ym long kum ki MP Lok Sabha ba tang hangne. Tangba lada nga ïoh biang ïa katei ka 5klur kumba kular u Myntri DONER ngan sa pyntip lyngba u Bah Daniel,” bynrap biang u Dr. WR Kharlukhi.
Katba na ka liang u BDO pat u la ai ka jingïaroh ïa ka shnong Nongkseh na ka bynta ka jinglah jong ka ban pyntreikam bha ïa ki skim kiba wan lyngba ka Block khamtam eh ka jingkloi ban ïatrei lang bad ki prokram kiba pynlong da ka block.
U Bah Daniel pat ha ka jingkren u la ïathuh ba hadien ba u la ïoh ïa ka jingkyrpad na ki nongïalam shnong kumta hi kum uwei na ki nongshong shnong u la ïa kren bad kyrpad ia u MP bad ruh ïa u Myntri Rangbah bad kumta hi khlem pynslem ka kam ka la urlong.
Da kaba pynpaw ïa ka jingsngew sarong ba ka shnong mynta ka la don la ka jong ka Anthem, u Bah Daniel u la ong ba kum uwei na ki nongkitkam shnong u ïohi ba dei tang ka jingïatrei lang ryngkat ryngkat kaba lah ban kyntiew ïa ka shnong ha ki liang baroh.
“Ka shnong kan kiew lada ngi ïa trei lang bad ngim ym dei ban ailad ïa ka jingïapher Balang ne ha ka politik, ha ka kam Kur ne ha kino kino ki kam,” u la ong.
Na ka liang u Rangbah Shnong ka Nongkseh Bah Myrank Thangkhiew u la pynpaw ka jingsngewnguh ïa u MP ka jylla bad kumjuh ïa u Myntri Rangbah kiba la pynïoh ïa kane ka skim lyngba ka jingpynïakren jong u Bah Daniel Thangkhiew.
“La slem bha ngi la thrang ban don noh la ka jongka ophis treikam hynrei dei haduh u snem 2024 hapoh ka jingïalam jong u Bah Daniel Thangkhiew ba la lah ban pynurlong ïa kane lyngba ka jingïarap u MP bad u Myntri Rangbah jongngi,” ong u Rangbah Shnong.
Nangta u ong ruh ba da ka jingdon mynta la ka jongka ophis treikam kin sa lah ban buh beit buh ryntih ïa ki kot ki sla jong ka shnong. U kyntu ruh ïa ki nongshong shnong lada ki don kino kino ki jingthoh lane ki matti jong u mynbarim kiba ïadei bad ka shnong ki lah ban wanrah khnang ba kin lah ban buh sahkynmaw ha ka iingshnong.