Rit mynsiem ki paid Khasi-Pnar ba sah ha Block-I ba ïaid sahuh ki riew kieng suloi

Shillong, Jylliew, 15: Ka Joint Action Committee Border of Meghalaya (JACBoM) ha ka sngi Balang ka la rai ban phah da ka jingthoh sha u Deputy Commissioner jong ka West Jaiñtia Hills District bad ka Ribhoi District bad kumjuh ruh sha ka Deputy Commisioner jong ka Hamren District, Asam da ka jingkyrpad ban ai jingïada ïa ki paid Khasi-Pnar kiba shong basah ha Block-I na ka daw ka jingdon jong ka kynhun kaba riam da ki jain shipai bad kieng da ki suloi ïa kiba la suba ba ki lah ban dei ki lehnoh.
U Chairman jong ka JACBoM u Bah Erwin K. Sutnga ha ka jingïakren bad ki lad pathai khubor hadien ba la wai ka jingïalang u la ïathuh ba ïa ka jingthoh yn sa phah hapoh lai sngi eiei bad pyntip ruh ba ka Joint Action Committee kan sa leit ban ïakynduh ïa ka Deputy Commissioner jong ka Hamren District khnang ban pan jingïada ïa ki paid Khasi-Pnar kiba sah ha ki shnong kiba hap ha Block-I.
U la ong ba ka jingthmu jong ka Joint Committee ban thoh da ka shithi sha kine ki lai ngut ki DC ka long ba haduh mynta ka dang neh ka Deputy Commisioner Level, ka SP Level Committe bad ka Chief Secretary Level Committee ban ïa kren halor ki jingeh kiba mih ha khappud kaba la don naduh ka por u Capt. W. A Sangma.
“Ngi la rai ban pyntip (sha ki Deputy Commisioner West Jaiñtia Hills, Ribhoi bad Hamren) namarba ki briew kiba rah suloi ki ïaid sahuh ha ki shnong Pnar sha Block-I. Kata ka dei ka jingeh kaba ngim tip lano kin bthei ki suloi. Ngi la rai ba ka lynti ka aiñ ruh ka don, ngin sa
“Lada kim ai jingïada, lada kito ki briew kiba rah suloi ki rahbor ki sdang ban siat bad leh ïa ki kam pyntriem bad ki paidbah jong ngi ki long ki bym don jingïada eiei,” ula ong.
“Ngin sa leit ruh shaduh Hamren ban ïakynduh ïa ka Deputy Commissioner bad ngin pynpaw ruh sha ki nong lehbor ba ngi don ka jingkitkhlieh ïa ka jaidbynriew jong ngi. Ym dei tangba ngi shu shong tang na Shillong,” u la bynrap.
“Nga kren da kaba shai ba kino kino ki kynhun kiba thmu ban leh ïa ki kam pyntriem pyrshah ïa ki Khasi kiba shong basah ha ka thaiñ Block-I bad Block-II ngin shim ïa la ka jingkitkhlieh bad ngin ym ailad ïa ki (Kynhun kieng atiar) ban shu pynïap beiñ kum ïa ki blang ki masi,” ong u Chairman ka JACBoM.
Ka JACBoM ka la kyntu ïa ka Sorkar Meghalaya ba ha ka jingïapynbeit pud jong ka kylla kaba ar dei ban wanrah shwa ïa ki shnong kiba la shah pynkynriah sha Karbi Anglong lyngba ka Notification 1951 donkam ban wanrah biang ïa ki shwa ban pyrkhat ïa ka jingïakren.
“Ka lynti kaba ngi kdew ïa ka Sorkar Meghalaya ka long ba ka 1951 Notifcation, 148, 149, 151 dei ban weng shwa ban sdang ka jingïakren halor u pud ba ïadei bad ka Block-I bad Block-II,” ong u Bah Erwin.
U la ïathuh ba ka JACBoM ka la shim ïa ka rai ba shwa ban sdang ïa ka jingïakren ka dei ban don shwa ka jingïasuk hapdeng ki paid Khasi-Pnar kiba shong basah ha khappud ka Karbi Anglong.
“Ka jingïakren ka dei ban long shwa da ka jingïakren ïasuk hynrei ym da ka jingkieng atiar lane da ka jingpynbor. Nga la kyrpad ïa ka Border Areas Committee kaba la ïalam da u Ma Comingson ba kin sdang ban plie ïa ka jingïakren bad ki paid Karbi. Kane ka dei ka jingkyrpad jong ngi ïa ka All Meghalaya Karbi Association (AMKA) ban ïatreilang khnang ban ïada ïa ki Khasi kiba sah sha ki shnong khappud kiba dang khlaw bad ki bym pat don wat tang ka surok, ka bording, ka umbam umdih bad kiwei kiwei,” la ïathuh u Bah Erwin.
U nongïalam jong ka AMKA u la ong ba ka kynhun ka pdiang ïa ka jingtyrwa jong ka JACBoM ban ïakren da ka lynti jong ka jingïasngewthuh jingmut.
“Ngin sa ïasyllok lang bad ki paidbah kiba sah ha ki shnong khappud kiba ju pynpaw ha ng ïa ki jingeh bad kumno ban weng ïa ka jingeh ka jong ki bad ngin sa shimkhia bha ïa kane ka kam,” u la ong.
“Ngin ym ailad ïa ki (lehnoh) ba kin wanjia kino kino ki jingjia bad ba ki briew kiba sah ha khappud kin im suk im saiñ,” la ai jingkular une u nongïalam ka AMKA.