Shillong, Jylliew, 15: Ka Deputy Commissioner jong ka East Khasi Hills District ka Kong Isawanda Laloo ka la plie ïa ka jingïakop ban pynitynnad ïa ki dong bad ki shnong ha Sor Shillong ha ka sien ka baar bad ïa ka skhim la mang na ka tnad Tourism da kaba ai ïa ki kot jingbthah ban pyntrei sha ki 23 tylli ki dong kiba la pan ïa kane ka skhim.
Kane ka skhim ka long ban dro dur, ban pynkhuid, ban buh jingthoh ha ki kynroh, ban thung ia ki tynrai dieng, ban buh ïa ki jaka shong ha ki jaka paidbah.
Halor kane, la sam ruh ïa ki kot ba la batai ïa ki shnong bad ia ki dong ba kin sngewthuh kumba pynsngewthuh ïa kaei kaba ki la ïoh jingtip na ka bhah kaba nyngkong.
Ka Deputy Commissioner ka la pynshai ba kan don ka jingai khusnam T. 10 lak ïa ka Dong ne ka Shnong, kan don ruh ka jingai khusnam ïa ki nongdro dur kiba tbit bha kaba don da ki kyndon kumno ban jied ïa kiba dei hok ban ïoh ïa ka khusnam.
Ka jingsdang ïa ka jingdro dur ha ki shnong bad ha ki dong ha ka bynta kaba nyngkong la sdang ha u Nailar 2021 bad kiba ïoh ha ka bynta kaba nyngkong ki ladep ban pyntrei bad ki la phah ïa ka kaiphot sha ophis jong ka Deputy Commissioner bad ïa ka pisa la pynlait sha baroh ki 34 tylli ki dong ne ki shnong.
Ka Deputy Commissioner ka la bthah ba kito ki shnong, ki dong kiba ladep ban dro lane ban shna ki lah ban pan ïa ka jingïarap ban sumar ïa ki jingdro ne ki jingshna haduh 10% na ka jinglut kaba la mang ïa ka skhim kaba ki ladep ban pyntrei.
