Shillong, Jylliew 15 : Kum ka dak ka jingai mynsiem bad pynshlur shuh shuh ïa ki khynnah skul bad samla pule ba kin nang minot bad kiew ha ki jingpule jongki u MLA jongka Mawlai Constituency u bah P.T Sawkmie u la pynbna ba un sam da ka khusnam kaba long da ka pisa sha baroh kito kiba pass bha ha kane ka result ba dang shu mih shen kata ka SSLC, ICSE, CBSE bad HSSLC( Arts, Science bad Commmerce).
Na ka liang u bah P.T Sawkmie u la ong “ ïa kane ka khusnam pynshlur bad ai mynsiem yn sam naduh kito kiba pass ïa ka First Division bad top 10 ha ka SSLC,CBSE bad ICSE (Arts, Science bad Commerce) bad ïa kito kiba pass ïa ka HSSLC yn sam tang ïa kito kiba pass hapoh ka Top 20 (Arts, Science bad Commerce). Kane ka jingsam kan long ruh tang ïa ki khynnah skul bad samla pule kiba don hapoh ka Mawlai Constituency. Nalor kane yn sam khusnam ruh ïa ki skul kiba ki khynnah ki pass ha ki Top 10 jongka SSLC bad Top 20 ha ka HSSLC”.
Na ka bynta ki jingtip kiba bniah yn sa pyntip da u MLA hadien katto katne por khnang ba ki khynnah skul bad samla pule kin tip kiei ki jingdonkam ba dei ban pynbiang ban ïoh ïa ka khusnam.
