Shillong, Lber 24: Ka Shillong Lajong FC ka la mad ïa ka namrem da 2-1 kol ha ka Inter Kashi ha ka wat ïakhun kaba 20 jong ka lympung I-League 2024-25, kaba la long shabar nala ïing ha Kalyani, West Bengal, ha ka janmiet jong ka sngi Nyngkong.
U Nikola Stojanovic (32′) bad u Mario Barco (39′) ki la pynskhem ïa ka Inter Kashi, kaba ïalehkai hala ïing, da kaba thep ar kol ha ka kylla step. Hynrei na ka liang jong ka Lajong ka la ïakhun shitom bad ka la ïoh ban pynphai kawei lyngba u Batskhemlang Thangkhiew (77′). Kane ka dei ka kol kaba nyngkong jong u Batskem ha kane ka I-League mynta ka samoi.
Kane ka dei ka namrem kaba saw jong ka Lajong ha ki san tylli ki jingïalehkai ba khatduh. Ka SLFC ka la hiar mynta ha ka kyrdan ba phra.
Hadien 6 sien lynter ki jingïalehkai shabar nala ïing, ka Lajong kan wanphai ha Shillong ban ïakhun pyrshah ïa ka kynhun kaba don ha ka thup kyrdan shah sloit (relegation zone), ka Aizawl kaba na mizoram, bad ka jingïakhun kan long ha ka 29 tarik Lber.
