Shillong, Jylliew 15 : U MLA ka BJP na Pynthorumkhrah ba dei ruh u Myntri barim ka sorkar jylla u la ong ba ki don bun bha ki party kiba wan ban khroh ïa u na ka bynta ban ïakhun ïa ka elekshon MLA kaban long ha u 2023.
“Ki la don bun bha ki party kiba wan khroh ïanga, tangba nga la rai ba ngan ïaineh beit bad ka BJP bad ngan ïakhun biang ruh na ka BJP,” u la ong haba kren bad ki lad pathai khubor.
Shuh shuh u la kyntait ruh ïa baroh ki khubor ba saphriang ba un leit ban ïasoh noh bad ka All India Trinamool Congress (AITC) hynrei u shu ong ba kitei baroh ki dei tang ki khubor suba suda.
Haba kren pat halor ka rai jong u MDC ka Mawkhar – Pynthorumkhrah, Bah PN Syiem ban ïakhun na constituency jong u, na ka liang u Bah Hek ula ong ba kam don satia kano kano ka jingtieng namar ba u la dep ban trei baroh san snem.
“Tang baroh ki kyrtong kiba ïakhun pyrshah la ki dei na ki party riewlum lane party rithor ki dei beit kiba khlaiñ, bad kumta donkam ban ym kheiñsting,” u la bynrap shuh shuh.
Haba ïadei pat bad ka rai jong u pyrsa jong u, u Bah Rocky Hek ban ïakhun pyrshah ïa u, u Bah Hek u la ong ba katei ka dei ka kam iing bad kumta kin sa pynbeit ha iing hi.
