Shillong, Jylliew 15 : Ka Deputy Commissioner jongka East Khasi Hills I Kong Isawanda Laloo IAS i la thaw ïa ka Committtee ka kyrpang ban peit ïa ka rukom die ïa ki doh ha ki ïew ki hat hapoh ka District naduh ka doh sniang, doh masi, doh kha, doh syiar, doh blang bad ter ter. ïa kane ka Committee la jer kum ka Animal Market Monitoring Committee and Animal Market Committee bad kane ka committee kan peit ïa ka rukom die ïa ki doh ha ki ïew ki hat bad ym dei ban shu wah pathar hynrei ban don noh da ki jingsop bad jaka buh kiba khuid ban lait na kino kino ki jingïabit khniang jingpang.
ïa kane ka DC ka la pyntip ha ka jingïalang ba la pynlong mynta ka sngi kaba la ïadon lang ma i kum i Chairman, Shillong Municipal Board, Hima Mylliem, Food Safety Commissioner bad ki nongmihkhmat na ki seng ki nongdie doh.
Ka jingthmu jong kane ka committee ka long ban peit ba dei ban bud ïa ka kyndon ba 18 jongka Aiñ ba 25 jong ka Prevention of Cruelty to Animals (Regulation of Livestock Markets) Rule 2017 ha kaba ïadei bad ka jingdie iaki jingri ba dang im.
La shim ïa kane ka rai kum ka jingbud beit bud ryntih ïa ka jingbthah ka ïing bishar High Court jongka jylla ha kaba ïadei bad ka mukotduma PIL ba la ujor da ka Gau Gyan Foundation.
Kane ka Committee kan pynlong ruh ïa ki jingïalang ban pynsngewthuh sha ki nongdie bad nongshoh doh khnang ba kin long kiba lehkhuid ban lait ka jingïabit na kino kino ki khniang jingpang.
Shuh shuh kat kum ka hukum ne kat kum ka Food Safety & Standards Act 2006/ Food Safety & Standard Rules and Regulations 2011, ki nongdie doh kim dei ban shu wah kumto ïa ka doh hakhmat ki dukan khlem da sop ne buh ïa ki ha ki jaka kiba khuid khnang ban ym ïabit na kino kino ki khniang jingpang.
