Nongstoiñ, Jylliew 15: Ka jingïap khlam jong u kwai ha baroh ki shnong kiba don ha khappud bad ka Assam, ka la buh ïa ki paitbah ha ka jinglyngngoh kaba jur, namar shisien ba ka khlam kwai ka la sdang na uwei u dieng, ka bteng sha kiwei pat bad suki suki ki jaka rep ki lah ban kylla synlen.
Ha kaba ïadei bad katei ka jingïap khlam jong ki dieng kwai, u bah Thomas Mawlieh uwei na ki nongrep kwai na ka shnong Tynghor West Khasi Hills, u la ong ba katei ka khlam kwai ka la sdang la katto katne snem, ha kaba bun ki nongrep kwai ha katei ka thaiñ, haba ki dieng kwai ki la sdang ban ïap, ki pom bad pynkyllon noh da kaba tharai ba ki bym pat shah ktah ha katei ka khlam kin lait hynrei kam shym long kumta.
U la ong ba ki paitbah kiba shong ha katei ka thaiñ naduh Mawthawkrah, Mawmareh, Tynghor, Nongthymmai, Domajaraiñ, Upper Rangsah, Nongrisan, Mawram, Noonmati bad kiwei kiwei ki shnong namar ba ki jaka rep kba ki duna bha ki hap ban ïabeh ban rep kwai, tympew, sying, kait, synsar bad ki soh.
Nalor kata u la ong ba wat la ka sorkar ka la ithuh ïa u synsar kum uwei na ki mar rep, ha kine ki snem ki paitbah jong kitei ki shnong kim da kham ïabeh shuh ban rep synsar, namar ba ka ïew kam long kaba thikna bad lada ka jaka rep kaba lah ban pynmih shi metric ton u synsar, pynban lada thung da u kwai ka lah ban ngiam da ki hajar tylli ki dieng kwai bad ka jingïoh ruh ka ïapher shibun.
U la ong ruh ba lada u kwai u soh bha saw haduh san tynrai, lah ban ïoh shi byrni u kwai bad ka dor kwai lada dei u ba bha ka dor ka poi haduh san hajar tyngka shi byrni. U la ong ruh ba lada thung synsar ha ka kper kaba thung shi spah tylli ki dieng kwah, ka jingïoh synsar ha ka por ba kheit lah ban ïoh tang kumba sanphew kilo. Lada dei ka por ba ka ïew ka hat kam ïaid bha te la hap ban shu bret kai, hynrei ka dor jong u kwai kam ju hiar hynrei ka kiew man la u snem khein bad lada u sei bha lah ban ïoh tang kumba san kilo ei ei.
U bah Mawlieh u la ong ruh ba ha katto katne bnai mynshuwa, na ka liang ki nongrep katei ka thaiñ ki la ïoh ban shong pyrkhat kumno kin leh bad u la ong ruh ba ki la dep phah jingtip sha ka sorkar bad ka la shimkhia, ha kaba ka la phah ïa ki briew jong ka bad ki la wan ban jurip ïa katei ka jingïap khlam ki dieng kwai. Hynrei haduh mynta ym pat ïoh jingtip la ka sorkar ka la lap ne em ïa ka daw jong ka jingïap khlam ki dieng kwai.
Nalor kata u la ong ba baroh ki paitbah nongshong shnong ha shilynter khappud bad ka Assam u dei u kwai tympew, u sying, ki soh, bad kiba rep kba kim da bun than, namar katei ka thaiñ ka dei kaba duna bha ki pynthor kba. Nalor kata u la ong ruh ba lada baroh ki dieng kwai kin ïap khlam, ka lah ban wanrah ïa ka jingkyrduh kaba khraw ïa ki paitbah nongshong shnong.
Haba kylli pat ha kaba ïadei bad ka rep sying, u la ong ba naduh u snem 2020 ka dor jong u sying ka dang neh shiphew tyngka shi kilo. Kata lada dei u sying u ba heh bha, hynrei lada dei uba kham rit lei lei ym don ba thied satia. U la ong ruh ba ki don ki nongrep ki bym leit khlong shuh na ki jaka rep, namar wat tang ka bai bylla ruh kam mih shuh.
