Nongstoiñ, Jylliew 15: Ka Seng UHM West Khasi Hills hadien ka jingujor jong ki paidbah ïa ka jingdkoh bad jingbym don ATM, ka la leit ban jurip ïa ki Bank kata ha SBI Riangdo, MRB Riangdo bad ha Mawthadraishan ruh ym don ATM ha MRB bad Punjab Bank.
Ka seng ka la lap ba haduh mynta ym don ATM Machine ha kine ki thain bad bunsien ki paidbah, ki hap ban ïeng ha u laiñ ba jrong ban leit sei pisa, kaba poi haduh u pud ba kim ïoh ka pisa namar ba lah bun briew palat.
Watla ki donkam kyrkieh katno katno ruh, hynrei kim banse ban ap ha kawei pat ka sngi bad don ruh ki por ba ki donkam kyrkieh, ba hap ban leit shim dawai, thied dawai bad kiwei kiwei ki jingdonkam kyrkieh kim banse ba ki hap ban leit jngai haduh ha ki jaka ba don ATM.
Kane ka wanrah ïa ka jingduhnong bad ki jingjynjar ïa kiba sah ha kitei ki thaiñ khamtam ïa ki duk ki suk jong kitei ki thaiñ. Kumta ka seng ka kyrpad ïa ki bor ba halor ba dei peit ïa ki bank ban buh noh ki ATM Machine ha kitei ki thaiñ, khnang ba ki paidbah jong kitei ki ar tylli ki thaiñ kin ïoh ïa ka jingmyntoi, ong ka kyrwoh na u President Bah Moonstar Nongrem.
U la ong ruh ba kane kam dei ka jingjia tang ha West Khasi Hils District hynrei ka dei ruh kaba la jia ha kiba bun ki ophis treikam jong ka Sorkar ha kaba ki shakri sorkar ki ju pyndik ia ki paidbah kiba ju leit wad jingiarap bad ki don ruh ki khep ba ka kam kaba tang hapoh shitaiew la lah ban pyndep ka shim por da ki bnai kat haduh ba ka pynbtai ia ki paidbah.
