Kumba 500 klur ïoh lum ka sorkar tang na ka khajna na ka tnad Excise ha u 2024-25

Shillong, Lber 12 : Ka tnad Excise ka la ïoh lum kumba 500 klur tyngka ka khajna tang ha une u snem 2024-25.
Haba jubab halor ka cut motion hapoh Iing Dorbar, u Myntri ka tnad, Bah Kyrmen Shylla u la ong ba ka khajna kaba la ïoh lum ha ki saw snem ba la dep ka long 375.38 klur ha u snem 2020-2021, 307.99 klur ha u snem 2021-2022, 365.16 klur ha u snem 2022-2023 bad 458.19 klur ha u snem 2023-2024.
Nangta u ong ruh ba ka tnad ka la shim ïa ki sienjam ban pynbeit bad pynjanai shuh shuh ïa ka rukom treikam khnang ba kin lah ban lum kham bun shuh shuh ka khajna na bynta ka jylla.
Nalor ka khajna na ka kyiad, la ïathuh ba ka khajna ba lum kadei ruh na ka bai laisen, ka bai pynpoi ïa ka mar, ka bai kit bad kiwei kiwei kynthup ïa ka ba lum na kaba dain kuna.
Da ka jingmih jong kiba bun ki jaka pynmih kyiad, ki jaka shna wain ha la iing kiba la ai laisen da ka sorkar ha ka jylla, u Myntri u la ong ba ka tnad ka dang don ha ka jingthmu ban buh ïa la ka jong ka Laboratory ryngkat bad ki briew kiba tbit ban peit bad bishar bniah ïa ki kyiad ban pynthikna ïa ka jingbha jingmiat lyngba ka jingstad saïan.
U ong ruh ba ka sorkar ka la shimkhia ban pynbeit ryntih bad pynkhlain ïa ka jingpynïaid ha Headquarter bad ha ki ophis ba hapoh jong ka da kaba thung ïa ki ophisar ha ki kyrdan kiba biang ha ki distrik bapher bapher bad ruh kumjuh ha ki sub division.
Da kaba pynpaw ba la shim ïa ki lad ki lynti kiba biang ban ïakhun pyrshah ïa ka jingjyllei ka kyiad ba shna beain, U Myntri u la ong ba la pynlong ïa ki jingkhynra bad jingpeitngor kaba jur kylleng kylleng ki jaka.
Ha Shillong, u la ong ba bunsien la ju pynlong ïa ki jingkhynra hapoh ka jingdon lang ki lad pathai khubor ban pyni ïa ka jingtreikam kaba kkhuid bad don jingkhein kaba la poi ha u pud ban lah tehlakam ïa ka jingjur ka jingmih ki nongdie beai ïa ka kyiad.
Halor ki jingkhynra ba la leh ha kine ki san snem, u Myntri u la ong ba la kem 1936 ngut, 3,139 tylli ki mukotduma ba la rejistar bad 1858 tylli ki mukotduma ba la weng noh katba 27,24,597 la dain kum ka kuna.
Shuh shuh u la ong ruh ba ka sorkar ka la dep ban ai haduh 11 tylli ki laisen ban shna kyaid, 57 tylli ki bonded warehouse, 854 tylli ki dukan kyiad bad 105 tylli ki jaka dih kyiad haduh u Rymphang 2025.
Ha kane ka cut motion, u Nongïalam ka Liang Pyrshah, Dr.Mukul Sangma u la ong ba ka rukom ai laisen pathar jong ka sorkar ka long shaba palat bad kane ka long kumba pynap shrip ïa ki nongseng kam.
U Dr. Mukul u ong ruh ba kane ka jingleh jong ka sorkar da kaba ai laisen pathar ka la pynlong ïa kiba bun ki nongseng kam ba kin hap ban khang khyrdep noh ïa ki dukan kyiad jong ki.
Kumta u la kyntu ïa ka sorkar ba kadei ban sangeh noh ka jingai laisen thymmai.