Rah ki Pulit sha thanat ïa u samla uba kynthoh ïa ka jingsiang surok torti ha Kuliang

Khliehriat Lber, 11: U Waheh Shnong jong ka shnong Pyrtakuna, East Jaiñtia Hills District Bah Loveyou Bareh u la mih shakhmat ban pynshai ba um don jingïadei eiei ruh bad ka jingshah rah jong uwei u samla na ka shnong Kuliang ha ki Pulit ka Umkiang Patrol Post ha ka Lah Sngi u Blei.
Ka jingshah rah u samla sha thanat Umkiang ka dei hadien ba la saphriang ha ka Social Media kaba la paw ba u samla u la lap ba ka jingshna ïa ka surok National Highway ha Kuliang ka long ka bym skhem haei haei ruh ha kaba tang shu khyllie ïa ka syrtap ba siang rong ha surok, ka jingsiang rong ka long kaba tang ha sla.
Halor kane utei u samla u la kren kynthoh sa ïa ka MLA jong ka Saipung Constituency ka Kong Santa Mary Shylla bad kynthoh ruh ïa ka Sorkar MDA ba la lamkhmat da ka National Peoples Party.
U Bah Loveyou Bareh u la ong , “nga kwah ban pynshai ïa ka jingkren i Kong Deivi Tongper ha kaba ïadei bad ka jingshah kem jong u samla na Kuliang ngam don jingïadei eiei hynrei ynda nga la poi ha thanat Umkiang u samla ba la shah kem u la panmap lypa shwa.”
“Nalor kata, nga kylli ïa u balei me leh kumto bad u la ong ba dei namarba u la buaid bad nga la kylli ruh ba balei me la kren tohmet kumto ïa ka MLA ka Kong Santa Mary Shylla da kaba me ong ka surok ka Santa Shylla me ong ruh ka surok jong ka Sorkar NPP. Kane ka surok kam dei jongno jongno hynrei ka dei ka surok jong ki paidbah,” la ong u Bah Loveyou Bareh.
“Hadien kata ngi la ïakren bad ngi la ïa sngewthuh jingmut bad la ïasuk hynrei hadien kata la kynnoh ba nga ong hana ka jingmap ka dei ha u SP bad u DC halor kane nga khlem ong eiei ruh,” la ong u Bah Bareh.
U la ïathuh ba ka MDC Kong Deivi Tongper la shu telephone ïa u ha ka por mynmiet ban kylli hato ka video ba leh da uto u samla ka la bakla seh? “Nga la jubab bad ong ba ïa kata kaba bakla ne kaba duna ngam tip, lada phi sngew ba ka biang te shim ba ka biang bad leh katba mon bad tang kumta hi i MDC i la buh noh ïa ka phone im kren eiei ïa nga,” la ong shuh shuhu Bah Bareh.”
“Nga ïatreilang bad u Bah Ngaitlang Dhar, nga trei kum u nongïarap, ngi tip hi ba ka surok ha kaba ïadei bad ka jingkhleh ïa ka dewbilat haba ym pat dap 21 sngi ne 30 sngi ym pat long ban ïaid kali hynrei ki briew ka thaiñ kim ju sngap bad kim ju lah shah haduh ban da long ban ïaid, haba ngi siang rong, ki kali kim ju ap wat tang shi kynta ki kali ki la ïa ïaid bad ruh don ki briew kiba pynjhieh da ka um ha surok, hato kumno ka surok kan neh,” u la ong.
“Lada uto u samla na Kuliang bad ka MDC ki kwah ban ai ka jingïatreilang ban pynbha ïa kano kano kaba donkam lada lap kano kano kaba duna dei ban ïakren shwa bad ki nongtrei balei ban shu pynsaphriang ïa ka video. Lada ki dei shisha ki nongmihkhmat kiba trei ïa ka hok ki dei ban sngewthuh ym ban leh kloi. Ha ka jingshisha, ngi baroh ngi duna hawei ngi biang hawei, kita ki jingduna ki lah ban don. Ha ki jingduna kiba kyndiat dei ban ïa sngewthuh jingmut ba ngi ruh ngin lah ban kham pynbha, hynrei tang shu lap kaei kaei kin shu leh noh ïa ka kam kane kam long kaba dei,” la ong shuh shuh u Waheh Shnong.