Ka jingdawa pisa kaba T. 11 klur tam ka dei na ka bynta ban siew tulop ïa ki nongtrei: Paul

By Mawphor Editor On Mar 8, 2025

Shillong, Lber 07: U Myntri ka tnat Social Welfare u Bah Paul Lyngdoh ha ka sngi Thohdieng u la pyntip ba ka jingdawa pisa bynrap ne ka supplementary demand kaba T. 11,79,82,243 ka dei na ka bynta ban siew ïa ka tulop ki nongtrei ha ka jylla, nangta ha ka district bad ka project kaba hab hapoh ka scheme Anganwadi Services State Component kaba la dep ban pynlut da ka tnat na ka bynta ban siew ïa ki tulop jong baroh ki nongtrei kaba la long naduh ka 1 tarik u bnai Lber, 2024 haduh ka 28 tarik u Rymphang, 2025.
Lah ban kdew ba ka jingsiew ïa ki tulop ki nongtrei la siew lyngba ka treasury kaba hab hapoh ka database kaba la siew beit sha ki nongtrei sorkar.
“Ka kyndon jong ka mang tyngka ha ka snem 2024-25 ka dei T. 1 klur kaba ym pat dap ban kynduh ïa ki jingpynlut ba la dep ban pynlut da ka tnat. Kumta la wanrah ïa kane ka jingdawa pisa kaba T. 11,79,82,243 na ka bynta ban siew ïa baroh ki jinglut ha kaba ïadei bad ka jingsiew ïa ka tulop kaba ha ka snem 2024-25,” ong u Bah Lyngdoh haba jubab ïa ka cut motion hapoh ka Dorbar Mang Tyngka.
“Shuh shuh ka pisa kaba la kot T. 5,42,14, 748 la wanrah ban regularise ïa ki tulop ba la dep sei bad kaba la ai sha ki officer bad ki nongtrei Anganwadi kiba hab hapoh ka Centrally Sponsored Scheme (CSS) ha ki district bad project level ha ka 1st quarter jong ka snem 2024-25,” u la bynrap.
U Myntri u la ong ruh ba ki tulop ba la dep ban siew ha ka shibnai sha ki nongtrei jong ka sorkar la leh lyngba ka treasury bad na ka regularized na ka pisa ba la pyllait da ka sorkar pdeng.
“Ka budget provision kaba la don hapoh ka Head of Account, “Centrally Sponsored Scheme 2235 – social security and welfare – 02 – social welfare – 102 – child welfare – (12) Integrated Child Development Services Scheme – 01. Salaries – General” kadei kaba la don ha ka mang tyngka ka snem 2024-25 ha kaba kane ka la kut bad kumta la donkam biang ban wanrah ïa ka jingdawa pisa bynrap,” pyntip u Bah Paul.
Haba ong ba ka Scheme Mission Vatsalya ka dei kaba hab hapoh ka CSS hapoh ka Ministry of Women and Child Development, u Bah Paul u la ong, “Ka jingpyllait ïa ka pisa da ka sorkar pdeng na ka bynta ka 1st, 2nd bad 3rd quarter 2024-25 ka la slem bad dei halor kane ba la tyrwa na ka bynta ka jingmang pisa lyngba ka Advance Contingency Fund (ACF) na ka sorkar jylla kaba la wanrah ruh da ka tnat khnang ban lah ban siew ïa ka tulop ki nongtrei hapoh ka Mission Vatsalya and Maintenance of Child Care Institution both Government Institution/NGO Institution kaba la kot sha ka T. 14,25,11,730, ha kaba ïa kane la dep ban mynjur bad la mang da ka sorkar lyngba ka shithi kaba 29 tarik u Risaw, 2024 bad ha kaba la siew ïa ki tulop sha ki officer bad ki nongtrei hapoh ka Mission Vatsalya kaba ïaid lang bad ka Maintenance of Child Care Institution ba la pynïaid da ka sorkar jylla bad ki NGO.”
“Ka pisa kaba la kot T. 14,25,11,730, la wanrah lyngba ka supplementary demand na ka bynta ban siew ïa ka pisa kaba la dep ban sei hapoh ka ACF,” u la bynrap.