Shillong, Lber 03: Ka long ka jingsarong ïa ka ri bad ka jaitbynriew ha kaba ka Muay Thai Association of Meghalaya [MTAM] ka la sei ïa 10 ngut ki khynnah samla – Shynrang bad Kynthei, kiba ka la jied ba kin mihkhmat ym tang ïa ka Jylla hynrei ïa ka Ri India sha ka rynsan ïakhun Muay Thai ban long ha Turkey, ïa kaba la tip da ka ‘IFMA Senior Mens & Womens World Muat Thai Championship Elite & U-23’. Kane ka Championship yn pynlong ha Kemer Antalya, Turkey bad kan sdang naduh ka 22 tarik jong u Jymmang haduh ka 01 tarik u Jylliew, 2025.
ïa kane la pynbna da u Bah Angelus Sunn, President jong ka MTAM uba long ruh u Chief Technical Director jong ka United Muay Thai Association India, ha ka jingïalang bad ki lad pathai khubor ha ka 03 tarik u Lber, 2025 (sngi Nyngkong).
Haba ai jingkren sha ki lad pathai khubor na ka liang jong u President jong kane ka synjuk, u Bah Angelus Sunn, u la pynpaw ïa ki jingeh kiba kum ka seng ka ïakynduh khamtam ha ka liang ka pisa namar ka jinglut jingsep ka long kaba bun.
“Ka shem jingeh ïa Ngi, ban bteng ïa ka jingpyrshang ba Ngin pynurlong ïa ka jingangnud jong Ngi ban jop ha ki rynsan ïakhun International, bad ban wanrah ïa ka burom sha ka jylla bad ïa ka ri baroh kawei, namar ka jingduna pisa. Te kumta, khnang ban nym pynlehnohei ïa kane ka kabu ksiar, Ngi kyrmen ba ka Sorkar ha ka jingïatreilang bad ka tnad Sports ba mynta ka kynti kin ai biang ka jingkyrshan khnang ba Ngin lah ban ïashimbynta ha kane ka jingïakop bad ban wanrah nam ïa ka Jylla bad ïa ka ri baroh kawei,” la pynpaw u Bah A Sunn.
Shuh shuh na ka liang jong ka Asociation kam lah khlem da ai khublei ïa u Myntri Rangbah ka Sorkar Jylla Meghalaya, u Conrad K Sangma, ïa u Myntri ka tnat Sports – Bah Shakliar Warjri bad ruh ïa u D. D. Shira (MCS) Director jong ka tnad Sports and Youth Affairs, kiba la ai jingkyrshan na bynta ki khynnah ïalehkai jong ka synjuk ba kin lah ban ïashim bynta ha ka IFMA Youth World Muaythai Championship, kaba long ha Thailand, Bangkok.
Kumba ka long mynta ka Muay Thai kam pat shym la ïoh jingithuh ha ka Indian Olympic Association [IOA] ban long kawei na ki jingïalehkai ban don ha ka National Games hynrei watla katta ruh ka synjuk ka la ai khublei ïa ka Meghalaya State Olympic Association [MSOA] kaba la pynrung ïa kane ka jingïalehkai ha ka Meghalaya Games ba dang shen, kaba la long ha West Jaintia Hills.
“Ngi sngew ban khublei shi katdei eh ïa ka MSOA kaba la ithuh ïa Ngi (Muay Thai) ban long kawei na ki jingïalehkai jong ka Meghalaya Games ha kaba Ngi la ïoh ïa la ka jong ka rynsan,” la ong u President ka MTAM da kaba bynrap, “Nga ngeit skhem ba Ngin dang lah ban sei shibun ki khynnah na bynta ban mihkhmat la ka long ha ki rynsan ïakhun hapoh ka Jylla, National ne International”.
Lada lah ban pynrung ïa ka jingïalehkai Muay Thai ha ka National Games ban long ha Meghalaya, na ka liang jong ka synjuk kan trei shitom ban pyntbit ïa ki khynnah ki jong Ngi ba kin ïalehkai bha khnang ba kin lah ban wanrah nam bad burom ïa ka Jylla, la pynpaw shuh u Bah A Sunn, da kaba kular ruh ba ka kynhun la kumno kumno kan khur beit ïa 10 tylli ki takma.
Ki khynnah ki ba la shah jied ban mihkhmat ki kynthup ïa 6 ngut ki shynrang bad 4 ngut ki kynthei, ha ka Senior Men – Under-23, ki long u Bansahnamkyrpang Warkhyllew (45 kg), u Andrew Maring (51kg), u Aris Syiemsad (54 kg): ha ka Elite, u Pynnehbor Mylliemngap (48kg), u Alandonald Kharthangmaw (51kg) bad u Sylvester Ingtih (63.5 kg).
Ha ka Senior Women – Under-23, ka Mary Christine Wriang (45kg), ka Anita Rai (48kg), ka Aibyntalin Kharumnuid (51kg), ka Soosy Phawa (54kg). ïa ka kynhun yn synran da u Bah Angelous Sunn u ban long kum u Referee bad u nongbishar.
