Da ka mang pisa kaba 50 lak, aiti u bah Carness Sohshang ban shna ïa ka madan Futsal ha Rangdkhew

Mawkyrwat, Lber 03: Ka long kaei kaei kaba pynkmen ïa ki samla jong ka shnong Rangdkhew bad ïa ka Rangdkhew Sports Club ha kaba mynta ka sngi ka 3 tarik u Lber, 2025 ki la ïoh pdiang ïa ka bhah kyrpang na ka Khasi Hills Autonomous District Council (KHADC) kaba long T. 50/- lak tyngka ban shna ïa ka madan Futsal kaba dei hapoh ka jingpeit jong u bah Carness Sohshang uba dei u MDC barim jong ka Mawkyrwat Constituency.

Lah ban kdew ba katei ka bhah kyrpang kaba kot haduh T. 50/- lak tyngka ka dei na ka bynta ban shna ïa kawei na ki jaka ïalehkai kynjatbol kata ka Futsal ka ban sa long ruh kawei na ki madan ba nyngkong eh ha ka thaiñ shilliang um.

U samla Wiseman John Lyngdoh haba kren ha ki lad pathai khubor u la pynpaw ka jingsngewnguh kaba khraw ïa u bah Carnes Sohshang ba u la lah ban wanrah ïa ka mang pisa ban shna ïa ka madan Futsal kaba ym pan ju ïohi mynno mynno ha ki thaiñ shilliang um hynrei ki shu ïoh sngew tang na ki briew ba ka la don ha ki thaiñ Mawkyrwat. Namarkata, da ka bhah kyrpang ba ki la ïoh napoh ka KHADC kin sa ïoh ban shna bad pyndep ha ka por kaba biang bad ba ma ki kin sa ïoh noh la kajong ka madan hapoh ka shnong bad kane kan sa pynkmen shi katdei ïa ki khun samla ha kane ka thaiñ baroh kawei, namar kane ka shnong Rangdkhew ka dei ka shnong kaba dang sahdien la jan baroh ki liang.

Katba ha ka jingkren  jong u bah Carness Sohshang ula pynpaw ka jingsngewkmen watla ha i bor barit u la lah ban wanrah ïa kane mang tyngka ban shna ïa ka Madan Futsal hapoh kane ka dong ka thaiñ shilliang um namar kane ka thaiñ ka dei kaba la sahdien tam na baroh ki shnong hapoh ka Mawkyrwat Constituency bad kaba dang donkam ban wanrah shibun ki kam pynroi la jan baroh ki liang.

Namarkata, u la pynpaw ba watla ula shah rem noh ha kane ka MDC ilekshon kaba dang shu dep hynrei na ka liang jong un ngan trei shitom bad kum ka dak kaba rit eh mynta ka sngi ula ïoh ban ai ïa ka mang tyngka ban shna ïa ka madan Futsal sha ki khun samla jong ka shnong.

Ym tangkata, u bah Carness ula ïathuh ruh ba na ka liang ka sorkar ka la ïoh ban mang pisa kyrpang na ka bynta ban pynbha ïa ki surok ha ka thaiñ Rangdkhew da kaba kyrmen ba kine kiei kiei baroh kin sa long ki jingkyrkhu ïa ki samla bad ïa ki paidbah jong ka thaiñ hi baroh kawei.

Ha kane ka sngi la sakhie lang da u bah Tenderness Kharjahrin uba dei u Sordar jong ka shnong Rangdkhew, ki longkmie bad ki samla jong kane ka dong ka thaiñ Rangdkhew.