Khliehriat Rymphang 24: Ha ka jingñiew ïa ki vote ha kane ka election MDC sha Jaiñtia Hills Autonomous District Council (JHADC), na ki shiphew tylli ki constituency kiba na East Jaiñtia Hills District kiba bun ki kyrtong kiba jop ki dei na ka party National Peoples Party ha kaba ki la don saw ngut kiba la jop, bud sa ka party United Democratic Party kaba la jop na ki ar tylli ki constituency bad ka party Voice of the People’s Party ruh ka la jop na ki ar tylli ki constituency, katba ka Indian National Congress bad kyrtong shiimet ki la jop mar iwei.
Ki saw ngut ki kyrtong jong ka National Peoples Party kiba la jop na East Jaiñtia Hills District ki kynthup ia u Bah Seiborlang Shadap (NPP) na ka 24- Sutnga Narwan Constituency ha kaba u la ioh haduh 3525 vote bad tam 857 vote ïa u kyrtong jong ka Voice of the Peoples Party u bah Lamsuk Langstang uba la ioh 2668 vote. Ha kane ka constituency baroh ki don 8392 vote, 46 vote sha ka NOTA bad 11 tylli ki vote ba shah kyntait.
U Bah Hambertus Nongtdu (NPP) u la jop na ka 25-Sutnga Nongkhlieh Constituency bad u la ioh 3952 vote ha kaba u la ioh tam 498 vote ïa u kyrtong jong ka INC, u Bah Seril Suja uba la ioh 3454 vote. Ha kane ka constituency ki don baroh 8392 tylli ki vote ha kaba 46 ki leit sha ka NOTA bad 11 tylli kiba shah kyntait.
U Bah Krison Langstang na ka party National Peoples Party (NPP) u la jop na ka 26- Sumer Constituency bad u la ioh 4049 vote ha kaba u la tam haduh 2009 vote ïa u kyrtong jong ka Voice of the Peoples Party u Bah Dakheiñkor Tangliang (VPP), hangne ki vote baroh ki don 7551 vote ha kaba 94 tylli ki leit sha ka NOTA, kiba sah pat ki leit sha kiwei ki kyrtong kiba khlem poi thong.
U Dr Sankey Shangpung, u kyrtong ka NPP mynta ka kynti ruh u la jop biang na ka 29- Bataw Lakadong Constituency bad u la ioh khur 3426 vote ha kaba u la tam 1934 vote ïa u kyrtong jong ka UDP u bah Joinriwell Pyrtuh uba la ioh tang 1934 vote. Ha kane ka constituency ki don baroh 8503 ki vote ha kaba 35 tylli ki leit sha ka NOTA bad kaba sah ki vote ki leit sha kiwei pat ki kyrtong ba khlem poi thong.
Ki ar ngut ki kyrtong jong ka United Democartic Party, ki ba la jop ki kynthup u Bah Lasky Rymbai (UDP) uba na ka 21-Tuber Wapungshnong Constituency uba la ioh khur 3662 vote bad tam 361 vote ïa u kyrtong jong ka Voice of the Peoples Party u Bah Delmon Phawa uba la ioh 3301 vote. Ha kane ka constituency ki vote baroh ki don 8948 vote ha kaba 49 tylli ki leit sha ka NOTA, 7 tylli kiba shah kyntait bad kiba sah ki leit sha kiwei pat ki kyrtong kiba khlem poi thong.
Uwei pat u kyrtong jong ka United Democratic Party uba la poi sha ka thong u dei u Bah Wailadmeshwa Siangshai, uba la jop na ka 22- Musniang Rangad Constituency, uba la ioh khur haduh 5555 vote bad pynliem ïa u MDC ba rim, u bah Phasmon Dkhar jong ka NPP da kaba u la ioh tam haduh 2917 vote. Ki vote kiba don baroh ha kane ka constituency ki long 9572 tylli ha kaba 50 tylli ki leit sha ka NOTA bad 2 tylli kiba shah kyntait bad kiba sah ki pat ki leit sha kiwei pat ki kyrtong kiba khlem poi thong.
Ki ar ngut ki kyrtong jong ka Voice of the Peoples Party kiba la poi sha ka thong ki dei ka Kong Deivipaia Tongper kaba na ka 28- Narpuh Constituency kaba la ioh khur haduh 4014 vote bad tam 717 vote ïa u kyrtong jong ka INC, u Bah Grimlang Dkhar uba la ioh 3297 vote. Ha kane ka constituency ki vote baroh ki don 10882 ha kaba 37 tylli ki leit sha ka NOTA, 3 tylli kiba shah kyntait bad ki vote kiba sah pat ki leit sha ki kyrtong ki ba khlem poi thong.
Uwei pat u kyrtong jong ka Voice of the Peoples Party uba la jop na ka 20- Muthlong Sohkymphor Constituency u dei u Bah Soki Lapasam, uba la ioh khur 3154 vote ha kaba u la tam 395 vote ia u kyrtong jong ka INC u bah Yookini Phawa uba la ioh 2759 vote. Ha kane ka constituency baroh ki vote ki don 12341 vote, 98 tylli ki leit sha ka NOTA, 1 la shah kyntait bad ki vote ba sah ki leit sha kiwei pat ki kyrtong kiba khlem poi thong.
U kyrtong jong ka Indian National Congress, u ba la jop na ka 27- Saipung Nongkhlieh u dei u bah Lalwilliama Theite uba la ioh 3002 vote bad tam 299 vote ïa u kyrtong jong ka NPP u Bah Arborhima Darnei, MDC barim uba la ioh 3103 vote.
Ka kyrtong shimet ne ka Independence Candidate kaba la jop na ka 23- Rymbai Khliehriat, ka dei ka kong Violet Lyngdoh, kaba la ju long teng ruh kum ka MDC myn ha ki snem ba la leit. Ha kane ka kynti ka la pynliem ïa u MDC barim u Bah Fineliness Bareh uba na ka pary UDP ha kaba ka ioh khur haduh 5552 tylli ki vote bad ka la tam 1835 vote ïa u kyrtong jong ka UDP uba la ioh 3717 vote. Hapoh kane ka Constituency baroh ki vote ki don 12537 tylli ki vote ha kaba 80 tylli ki leit sha ka NOTA, 6 tylli kiba shah kyntait, bad kiba sah ki leit sha kiwei pat ki kyrtong kiba khlem poi thong.
Baroh kitei ki shiphew ngut ki kyrtong kiba na East Jaiñtia Hills District kiba la poi sha ka thong kum ki MDC sha ka Jaiñtia Hills Autonomous District Council, ki la ai ka jing khublei ïa ki paidbah kiba la ai ka jingkyrshan ïa ki haduh ba ki la poi sha ka thong ha kajuh ka por ki la kular ruh ba kin trei bha na ka bynta ki constituency ba ki la jop ban wanrah ïa ka bha ka miat, ban kyntiew ïa ka roi ka par ha ki shnong ki thaw.
