Dei ban kyntait ïa ki party kiba thok bad ïalam bakla ha kyrteng ka Jaidbynriew – Bah Prestone

Shillong Rymphang 19 : U President jong ka National People’s Party (NPP) ba dei ruh u Symbud Myntri Rangbah ka jylla ha ka sngi Balang u la kyntu ïa ki paidbah ba ki dei ban kyntait ïa ki party kiba thok bad pyrshang ban ïalam bakla ïa ki paidbah ha kyrteng ka Jaidbynriew.
Haba kren ha ka jingïalang ïalap elekshon kaba long ha ka shiteng sngi ha Pohkseh na bynta u kyrtong ka party na Nongthymmai, Bah Pynïaid Sing Syiem, u Bah Prestone u la ong ruh ba ki paidbah ki dei ban ailad biang ïa ka NPP ba kan ïoh biang ïa ka bor synshar ha KHADC bad kumjuh ruh ha JHADC na bynta ka roi ka pa ha ka jylla.
U Bah Prestone ha kane ka sngi u la kynmaw burom ruh ïa u MDC barim ka Nongthymmai Bah Latiplang Kharkongor, uba la khlad noh na kane ka pyrthei ha u snem ba la dep, na ka bynta ka jingnoh synñiang jong u ha District Council bad ruh na bynta ka bha ka miat bad ka bit ka biang jong ka Nongthymmai constituency baroh kawei.
U Symbud Myntri Rangbah u la kyntu ruh ïa ki paidbah ba kim dei ruh ban shah pynngop ha ki party kiba pyrshang ban ïalam bakla ïa ki paidbah da kaba pynphriang ïa ki khubor thok ha kyrteng ka jingieid ïa ka Jaidbynriew bad ba ki dei ban kyntait mardor ïa ki.
“Ban ong ba phi lah ban leh katba phi mon ha jaka la jong kam dei kaei kaei hynrei ka jingpyrshang ban ïalam bakla ïa ki paidbah khamtam eh ïa ki khun samla,” u la ong.
Da kaba pynpaw ïa ka jingsngewkhia halor ka rukom ïalap elekshon ha ka jylla, u Bah Prestone u la ong ruh ba lada peit katkum ka history kadei hadien ka elekshon MLA ha u 2023 ba ka la jur bha ki kyntien bym sngewtynnad ha ki rynsan ïalap elekshon bad ruh haki social media kaba la ktah bha ïa ka burom jong ki paidbah ka jylla baroh kawei.
U Bah Prestone u la ong ruh ba kane ka dak kam dei satia kaba itynnad ba kan jia ha ka jylla. “To ngin bishar hi ïalade namar ka rukom ïalap elekshon jong ki kadei kaba ym itynnad satia,” u la ong.
Da kaba kyntu ïa ki paidbah ka Nongthymmai ba kin jied ïa u Bah Pynïaid, u Symbud Myntri u la ong, “U Bah Pynïaid u long kum u mawkordor ka Jaidbynriew bad phi long kiba donbok ba u treh ban wan iakhun na kane ka constituency kaba la shai la shemphang bha.” U ong ruh ba dei hapoh ka jingïalam jong u, ba ka KHADC kala lah ban pynlong ïa bun tylli bha ki ain rew (Bill) kiba mynta ki la long ain ban ïada ïa ka khyndew ka shyiap, ka riti dustur bad ka jinglong tynrai jong ka Jaidbynriew.
Haba kren pat ha ka jingïalang ïalap elekshon na bynta u kyrtong na Sohiong Bah Samlin Malngiang, na ka liang u Bah Prestone u la kyntu ïa ki paidbah ba kim dei ban pynshlur ïa ka bat ar maloi, kata ban bat lang ïa ka kam MLA bad MDC da ujuh u briew. U ong ruh ba ki paidbah ki dei ban jied ïa u Bah Samlin ba un long u nongrah ktien na bynta ban wanrah ïa ki kam pynroi ha ka constituency hadien ka elekshon KHADC kaban long ha ka 21tarik mynta u bnai.
U Bah Prestone u la ong ruh ba ki paidbah ka Sohiong mynta ki babe ba ki la kum bakla ha ka elekshon MLA kaba long ha u 2023.
“Kumta, nga sngewskhem ba ngin ym bakla shuh kumba ngi la leh ha ka elekshon ba la dep bad ba ngin ai ka jingkyrshan kaba pura ïa u Bah Samlin,” u la ong.
U Bah Prestone u la ong ba watla um kwah ban kynthoh ïano ïano ruh hynrei dalade u la lap ba ha ka por ba u bat ïa ka kam MLA jong ka Langkyrdem ha ki snem 2003 u la bat ruh ïa ka kam MDC jong katei ka thain hi naduh u snem 2004. Kumta lada jia ei ei khamtam kum ki jingjia ba sngewsih u hap ban beh hi marwei namar ba u bat hi marwei ïa ka kam MLA bad MDC nalor ba u bat ruh ïa ka kam Myntri Sorkar.
“Dei naduh katei ka por nga la rai ba ngam dei shuh ban bat ar kam namar ka eh ban pynbiang. Nga kynmaw ruh ba u Bah Samlin ha ka por ba u jop kum u MLA ha u 2018 u la ai noh ïa ka kam MDC ha uwei pat. Kane kadei ka kam kaba paka tam,” u la ong.
Katba ha Mylliem constituency, u Working President ka party ba dei ruh u MLA barim, Bah Hamlet Dohling ryngkat u Treasurer ka party Bah Daniel Thangkhiew ki la hiar sha Mylliem ban pan jingkyrshan na ki paidbah katei ka thaiñ na bynta u kyrtong ka party samla Fineststar Kharkongor.
Ha kane ka jingïalang, kine ki nongïalam ki la kyntu ïa ki paidbah ba kidei ban kyndit bynriew noh bad ba kim dei shuh ban babe kumba la jia ha ka elekshon MLA 2023 bad elekshon MP 2024.
“Kaei kaba la jia ha u snem 2023 bad 2024 ka dei ka kam kaba la dep bad kumta phim dei shuh ban babe hynrei ban pynbeit noh nangne shakhmat,” ki la kyntu ïa ki paidbah kiba la wan tuid lang khrui ha kane ka sngi.
Katba u kyrtong ka party, samla Fineststar Kharkongor pat u la kyntu ïa ki paidbah ka thaiñ ba kin kyrshan ïa la u khun uba mih bad heh ha katei ka shnong bad ruh uba la aiti lut ïalade na bynta ka thaiñ bad ka imlang sahlang.Ha kane ka sngi ki nongïalam ka party ki la pyntip ruh ba kylleng ki bynta jong ka Upper Shillong bad ruh ha Mylliem Lum, ka party ka ïoh ïa ka jingkyrshan kaba radbah na ki paidbah bad kumta, ki phaikhmat da ka jingkyrmen ba ka thaiñ bad ka shnong kaba pynmih ïa une u samla kan pynjop donburom ha kane ka elekshon MDC.