Pynthikna u Bah Prestone ban maramot ïa ki surok ha thaiñ Sohra lada jied ïa u Bah Donevan

Shillong, Rymphang 18: U Nongïalam ka National People’s Party (NPP) bad u symbud Myntri Rangbah ka jylla u Bah Prestone Tynsong u la pynthikna ban pynïoh bad ban maramot ïa ki surok kiba bha sha kiba bun ki shnong jong ka thaiñ Sohra constituency khamtam eh ban kyntiew ïa ki kam jngohkai pyrthei bad kumjuh ruh ban ïarap ïa ki paidbah kane ka thaiñ baroh kawei lada ki paidbah ki jied ïa u MDC barim u Bah Donevan Wanlang.
Haba kren ha ka jingïalap elekshon ïa u MDC barim u Bah Donevan Wanlang ha Khrang, Sohra ha ka sngi baar u Bah Tynsong u la ong, “Nga kyntu ïa ki paidbah ban ïalong kawei ban ai ka jingkyrshan ïa u Bah Wanlang khnang ba kan dang pynkhlaiñ shuh shuh ïa u MLA ba mynta u Bah Gavin M Mylliem, kane kan pynkhlaiñ ruh ïa nga kum u Symbud Myntri Rangbah bad kan pynkhlaiñ shuh shuh ïa u Myntri Rangbah ban wanrah ïa ki kam pynroi kiba bun sha kane ka thaiñ.”
“Ngi pynthikna ban wanrah ïa ki kam pynroi kiba kynthup ïa ki surok sha kiba bun ki shnong, kiba dang donkam ïa kine ki kam pynroi kum ka surok bad kiwei kiwei. Kumta lada phi pynjop ïa u Bah Wanlang, kan long kaba suk ïa nga ban treikam,” u la bynrap.
Haba ïathuh ba shen ka sorkar kan sa shna ïa ka jingkieng nalor ka wah kaba pynïasoh ïa ka shnong Kongthong bad ka Khadarshnong bad Wahkhen, u Bah Tynsong u la ong, “Ngi la dep mang ïa ka pisa bad ki kam jingtei kin sa sdang noh shen, bad shisien ba la pyndep ki nongwan jngohkai kin sa wan sha kane ka shnong Wahkhen.”
U la ong ruh ba donkam ïa ki kali ki ban ïaid na shnong Swer bad Wahkhen sha Pomlum bad Khadarshnong.
“Nga la kyntu ïa u sordar shnong, raid Wahkhen bad Khararshnong ban wad jaka ban pyntreikam ïa kane ka projek,” ong u Bah Prestone.
“Namar kata ka long kaba kongsan ban jied ïa u MDC bad MLA na kajuh ka party khnang ba kin ïatreilang bad ka sorkar na ka bynta ki kam pynroi hapoh ka constituency,” ong u Bah Tynsong da kaba kyntu ruh ïa ki paidbah ba kim dei ban shah ïalam bakla halor ki jingshah kynnoh ba ka NPP kadei ka parti Garo.
“Ha ka jingshisha kam dei ka parti Garo namar nga dei u state president bad u Conrad K Sangma u dei u Myntri Rangbah ka jylla bad u national president. Sngewbha nai ngeit ïa kum kine ki jingshah kynnoh kiba bakla,” u la ong.
Haba kren ha kane ka sngi na ka liang u Bah Wanlang u la ong ba u la long u MDC jong ka Congress naduh ka snem 2014 haduh ka snem 2019 bad ha u snem 2018 u la ïakhun pyrshah ïa u MLA u Bah Gavin M Mylliem hynrei u khlem jop satia. “Kumta haba nga ïohi ba u MLA ba mynta u la trei bha ïa ki kam na ka bynta ban wanrah ïa ki kam pynroi ha ka constituency, kumta nga la rai ban mih noh na ka seng Congress ban kyrshan ïa u ha u snem 2023.”
Haba kyntu ïa ki paidbah ban kyrshan ïa u ha kane ka elekshon ban wan sha KHADC, u MDC barim u la ong, “Hadien ba nga la pynrem ïa u MDC ba mynta na Sohra u Bah Titosstarwell Chyne jong ka UDP da kumba 1500 vote ha u snem 2014 bad kum u MDC nga la mad bun ki jingeh naba kam don ka jingsngewthuh jingmut hapdeng jong nga bad u MLA barim ka Sohra.”
“Nga la long teng u EM in-charge ka Land bad ha u snem 2016 kim don satia ki pud ki sam kiba biang bad nga la pynmih ïa ka hukum kaba long katkum ki kyndon jong ka council ba dei ban phah pynrung kyrteng ei ïa ki trai jaka kiba im basah ha ki thaiñ khappud. Bad kane ka jingmut ka long ruh ban pynkhlaiñ ïa ki kot ki sla jong ka Meghalaya ha kaba ïadei bad ki kam ïakajia pud bad ka Assam,” u la ong.
Haba ong ba ka Sixth Schedule ka kham khlaiñ bor ban ïa ka Article 371, u Bah Wanlang u la ong, “Ka long ka jingkyrkhu kaba khraw ba ngi ha Meghalaya ngi don ïa ki 3 tylli ki autonomous district council (ADCs) kaba long katkum ka kyndon jong ka Sixth Schedule jong ka riti synshar ka ri ban ïada ïa ki riti dustur bad ki kolshor hynrei ka long pat kaba sngewsih ba la ïohi ba ka don ka jingdawa ban pynïoh ïa ka Article 371. Ka Article 371 ka dei kaba tlot haba ïa nujor bad ka Sixth Schedule. Kiwei ki jylla ha kane ka thaiñ shateilam mihngi kiba don ïa ka Article 371 ka dei ka Nagaland bad ha ki elekshon MP ba la dep kiba bun ki shnong ki la kyntait ban shim bynta ha ki election, naba ki la dawa ban pynïoh ïa ka Sixth Schedule bad ym dei ïa ka Article 371 namar ki la ïohi ba ka Sixth Schedule ka kham khlaiñ bor.”
“Kumta ka agenda jong ka NPP ka dei ban ïada ïa ki jaitbynriew riewlum. Ha kine ki 7 snem ba la dep ka sorkar ba la ïalam da ka NPP ka la shim ïa ka rai kaba shlur ha kaba ïadei bad u pud u sam bad kumjuh ruh ban wanrah ïa ki kam pynroi kiba bun ha kane ka jylla, kumta nga kyrpad ïa phi ban ailad ïa nga bad ïa ka party jong ngi,” u la ong.