Randien u kyrtong VPP, UDP bad Congress haka rynsan ïathir ka Synjuk ki 5 Shnong ha Umroi

Nongpoh, Rymphang 17: Napdeng 5 ngut ki kyrtong ki ban aireng ha kane ka elekshon MDC ban wan na Umroi Constituency, tang u Bah George B Lyngdoh kyrtong shimet bad u Bah Rangkynsai Kharbuki kyrtong ka NPP kiba la wan poi ha ka rynsan ïathir (Common Platform) bala pynlong da ka Synjuk ki 5 Shnong haka shnong Liarsluid jong ka Umroi Constituency ha Ri Bhoi District bad ïa katei ka jingïalang la pynïaid da u Bah Kyrmen Lang Uriah, Editor U Shillong Mail.

Kum ban shu kdew hangne ha Umroi Constituency ki don haduh 5 ngut ki kytong ki ban aireng ha kane ka elekshon MDC ban wan ba kynthup ïa u Bah George B Lyngdoh kyrtong shimet, Bah Rangkynsai Kharbuki kyrtong ka NPP, Bah Micky Douglas Syiem kyrtong ka Congress, Bah Isynei Hinge kyrtong ka VPP bad u Bah ka samla Naphishisha Marweiñ kyrtong ka party UDP, hynrei 3 ngut ki kyrtong kim shym la poi ha katei ka jingïatai ïathir ba ki paidbah ki kwah ban sngap ïaka nongrim jong ki ba ki don ban wanrah lada ki poi sha ka thong.

Ka Synjuk ki 5 shnong ba kynthup ïaka shnong It Sohpa-ir, Madanrtiang, Mynri Umsning, Khweng bad ka Liarsluid kala shim ïaka rai ban pynlong da ka Common Platform ka long ban sngap ïaka sur bad ka nongrim jong kitei ki kyrtong ka Umroi Constituency, hynrei phewse bun ki paidbah kiba la ap khmih lynti ban sngap kim shym la iohi ïa ka dur jong baroh ki kyrtong ki ban aireng ha kane ka elekshon MDC ban wan namar ba kim lah ban poi khlem da tip thikna ïaka daw, lait noh tang u Bah George B Lyngdoh bad u Bah Rangkynsai Kharbuki.

Haba pynshai halor ka nongrim ha katei ka sngi naka liang u Bah George B Lyngdoh u la ong ba ka jingleit jong u ha katei ka sngi ka long ban ieng haka nongrim lajong bad ka nongrim jong ka Constituency hi baroh kawei, ngi la mad shibun ki jingeh kum ki shnong ki thaw haki snem bala dep haduh ki sngi ba mynta, ngi iohi ïaka jingtuklar politiks naka liang jong ka District Council khamtam eh ha kaba ïadei bad ka riti ka synshar ha kaba ïadei bad ki kam shnong kam thaw, naduh ka kam thung Rangbah Shnong, ki Syiem ki Sordar.

“Nga ieng naka bynta kawei ka daw ba lada ka District Council kan ïai leh politiks ïaki shnong kiba don haka ri Khasi, naduh ka jingthung Rangbah Shnong, jingthung ïaki Sordar, ki Lyngdoh bad ki Syiem, kane ka ri jong ngi kan sa jot, ngi dei ban burom ïaka jingjied jong u paidbah bad kane ka long ban pynbeit ryntih namar ka rai ka dei ki paidbah ban jied ïaki nongïalam” la ong u Bah George.

U Bah George B Lyngdoh u la ther tyngeh ruh ha kaba ïadei bad ka jingai trading license pathar jong ka District Council ba bun naki samla kim iohlad shuh ban trei ban ktah bad ka iohkam iohjam namar bun naki kam baheh baheh la trei beit da ki kontraktor ba nabar khamtam ki ophis sorkar jong ka sorkar India namar naduh ki snem bala leit haduh mynta ka District Council kam nud ban leh eiei ha kaba ïadei bad ki kam ki jam haki tnad ophis jong ka sorkar pdeng.

U la ong ruh ba bun naki longiing ba duk ba jynjar kim don wat ka nongrim iing ban shong ban sah bad kane kala buh jingeh shikatdei ïaki paidbah khamtam ha Umroi Constituency namar ka jingtlot ka riti bat khyndew.

U Bah George B Lyngdoh u la ong ruh ba ngi donkam ïaki kam pynroi hynrei ngi donkam ruh ïaki polisi treikam khnang ba ka pateng ban wan kan suk naduh ka rep ka riang, ban kyntiew ïaka kamai longkynthei, ban pynkhlaiñ ïaki Shnong ki Hima, ban don ruh ki skul hikai naka bynta ki nongïalam bad ki nongsynshar shnong bad kiwei kiwei ban pynkylla ïaka rukom treikam jong ka District Council ban pynkhlaiñ ïaka khyrnit ba hynriew jong ka riti synshar.

“Ngala mad ïaka jingkthang ha kane ka elekshon 2023 bala dep, ym dei mangi ki khasi kiba rai ïaka jop ka rem bad kaba sngewsih ka long ba kane ka jia ka kongstituency Umroi, ka jingkylli ka long shaei jah ka District Council, kane ka pynpangnud ïanga” la ong u Bah George da kaba bynrap ruh ba ai ba kine kin long ki symboh pyrkhat ïaki paidbah khamtam eh ban ai ka lawei ba bha naka bynta ka constituency.

U Bah Rangkynsai Kharbuki haba kren ha katei ka sngi u la ong ba ha kine ki 6 tylli ki snem haka jinglong MDC u la leh shibun ki kam ryngkat ka EC khamtam ka jingbym don jong ka aiñ bat khyndew hynrei tang hadien katto katne por la thaw ïaka Land Bill bad tang hadien katto katne por u lat ka jylla u la soi muhor ban pynlong aiñ ïa katei ka Bill kum ka Land Act.

U la ong ruh ba ki paidbah haba ki phah ïaki nongmihkhmat sha District Council kam dei than tang naka bynta ka kam pynroi hynrei ban pynneh pynsah ïaka riti ka dustur, kaba ki khun khasi khara kila bud naduh ka jinghikai u mynbarim bad kane ka dei namar ka jingdon jong ka District Council kaba pynkupbor namar lada ym don ka District Council lehse ka jaitbynriew jong ngi kan sa jah noh na kane ka sla pyrthei.

“Ngam dei u briew ba kynthoh, hynrei ngi donkam ka jingïatreilang ban kyntiew ïaka jaitbynriew jong ngi, ka mynsiem jong ka jingieid, ka jingïatylli bad ka juh ka jingmut” la ong u Bah Kharbuki da kaba bynrap ruh ba kane ka EC kaba mynta kala trei shibun ki kam khamtam ki aiñ bad kawei naki jingjop ka dei ka Admisnistration of Elaka Amendment Act 2023 ban pynkhlaiñ shuh shuh ïaki Dorbar Shnong, ki seng longkmie shnong, nangta ka Khasi Hills Autonomous District (Regulation and Administration of Land) Act, 2021 ban ïada ïaka jinglongtrai ha kaba ïadei bad ka khyndew ka shyiap, ka Khasi Social Custom of Lineage Amendment Act 2023, ban pynskhem ïaka rukom shim jait namar ka jaitbynriew jong ngi ka long kyrpang namar ka jingai jait sha ka kmie, watla ki don ki seng saiñ Hima kiba pyrshang ban ïalam bakla wat ka rukom shim jait.