Pyllait u Bah Daniel sa ka kot, ‘Ki nongïaleh laitluid ka Meghalaya ha ka juk synshar ki Phareng’

Shillong, Rymphang, 16: Ka kot ba la ai kyrteng “Freedom Fighters of Meghalaya During British Rule” la pyllait paidbah ha ka sngi Thohdieng ka taiew ba ladep ha Meghalaya House Conference Hall, APJ Abdul Kalam Road, New Delhi.
Ïa kane ka kot ba la thoh da u Bah Daniel Stone Lyngdoh u Muktiar uba mihkhmat ïa ka Sorkar Meghalaya ha Iingbishar Supreme Court of India la pynphriang da ka Ri Khasi Book Agency, Shillong.
Ïa ka kot la pyllait paidbah da u Director General of Police (DGP) u Robin Hibu uba long ruh u President jong ka Helping Hand NGO kum u Kongsan.
Haba kren ha kane ka sngi, u Hibu u la ong ba kane ka kot ka long kaba kynsai namarba la lum thup shaphang ka jingïaleh laitluid jong ka ri India bad ïa synñiang u bynhei jong ka thaiñ Shatei Lammihngi.
U Hibu u la ong ba kane ka kot ka long kaba kynsai bha na ka bynta ki khynnah pule bad ïa ki nongwad bniah, namarba ka don ïa ka dor kaba pynsngewthuh ïa ka jinglen lade jong ki khlawait nongïaleh laitluid ka jylla Meghalaya.
U Director jong ka Ministry of Education Amstrong Pame u la ïathuh ïa ka jingshem jong u shimet mynba u dang pule ha nongbah Shillong bad ïathuh ruh ïa ka jingkordor jong kane ka kot na ka bynta ki pateng kiba dang dang khie dang san.
U la kyntu ïa ki nongpule ban sngewthuh ïa u synniang jong ki nongïaleh laitluid ka jylla Meghalaya bad ban bud nuksa ruh ïa ka jingïaleh jong ki.
U Assistant Professor jong ka School of International Relations, Jawaharlal Nehru University (JNU), New Delhi Dr. Teiborlang T Kharshytiew, u la ïaroh ïa ka jingwad bniah jong u Bah Daniel kat haduh ba u la lah ban pynmih ïa kane ka kot. U la pynbna ruh ba ïa kane ka kot yn sa pynrung ïa ka lynnong pule jong ka JNU ka ban long ka jingmyntoi na ka bynta ka jingleh ïa ka jingwad bniah.
Kiwei pat kiba la sakhi lang ha kane ka sngi ki long u Editor jong ka Pigeon Book India u Kaushal Goyal, ka Medical Commissioner jong ka North Zone, ESI Chandigarh Regional Office ka Dr. Vanora E Nongrum bad kiwei kiwei ki kynrem ki lyndan na kylleng ka ri India.
U Bah Daniel Stone Lyngdoh ula ïathuh ba ka la shim por ïa u haduh lai snem ban thoh pyndep ïa kane ka kot. U la ïathuh ruh ïa ki jingeh bad ki jingshah tynjuh ba u la mad ban ïoh ïa ki jingtip ba thikna na ki bahaing hasem jong ki nongïaleh laitluid ka jylla Meghalaya. La pynmih ïa kane ka kot, da ka jingïakren markhmat jong u nongthoh ïa ki bahaing hasem jong ki nongïaleh laitluid, ka jingwad bniah ïa ki jingtip ba shisha khnang ba ki nongpule kin kham sngewthuh shai ïa u synñiang u bynhei jong ki nongïaleh laitluid.
Kane ka kot ka la ïoh ïa ka lamkhmat da u nongjop ïa ka khusnam Padma Shree u Prof. David R Syiemlieh, uba long u Vice Chancellor jong ka Rajiv Gandhi University bad u Chairman jong barim ka Union Public Service Commission (UPSC).